小編最近經過藍田海港酒家,發現它以「$38任飲任食自助火鍋吧」,費用已包茶芥及醬料,真係咁平咁抵食?試過就知!
入座後隨即點選湯底,湯底需要額外收費屬意料之內,畢竟餐牌講明只有「自助火鍋吧」是任食的;湯底每鍋由$48起,可選雞煲、豬骨煲、皮蛋莞茜鍋等,幾足料價錢算合理,豬骨鍋的湯料味道還不錯!
走近最期待的任食火鍋自助吧,一眼望完,配料只得幾款蔬菜、豬皮、粉絲和韓式拉麵,不夠15款,連普通的丸類都無供應,失望。
幸好蔬菜如生菜、南瓜、蘿蔔、木耳等衛生新鮮,加上有任食杯裝雪糕和樂天罐裝飲品,挽回一點點分數。
小編與同行友人都不能滿足於「任食自助火鍋吧」,唯有加錢追加火鍋料,兩個人共追加了4款,包括安格斯肥牛($48)、自家製黑松露墨魚丸($25)、響鈴($15)及午餐肉($12),份量剛剛好。
追加食品的價錢相宜,而且質素不錯,特別是肥瘦適中的牛肉,3-4人享用亦可,叫人滿意。墨魚丸夠彈牙,充滿黑松露的香氣;響鈴則能保持香脆,奈何過份油膩。
$38任飲任食?當4個人共享一個湯底,每人最平都要付$50(另收加一);如你是食肉獸,按捺不住追加肥牛及其他火鍋料,埋單很容易就過百元!(小編埋單每位$125)
雖然最後收費與$38有一段「相當大的距離」,不過平心而論,無論是任食抑或追加的火鍋配料質素,都比坊間不少酒樓好,百多元打邊爐平定貴,見人見智視乎你處於糧頭抑或糧尾狀態…
-------------------
收費:
星期一至五 $38/位
星期六至日及公眾假期 $48/位
*另收加一
*90cm以下小童免費
*只限藍田啟田商場分店
活動資訊
- 日期2016年3月6日起 由即日起至另行通知為止
- 地址 藍田啟田道50號啟田商場3樓301號舖
- 電話2379-9089