熱愛優質生活
首頁   \   港熱話   \   請往月台較少人的位置候車,會比較容易上車

請往月台較少人的位置候車,會比較容易上車

2016.03.11

文:墨者

 

每次繁忙時段座地鐵都會聽到依段廣播「請往月台較前位置候車,會比較容易上車」。

聽到之後潛意識第一時間嘅反應多數係望下邊度門前面排得少人啲,然後排到之後繼續聽歌玩手機。醒目少少嘅人就會即刻sense到依段廣播有少少問題,講到好似如果佢唔做廣播嘅話啲人就唔識去少人既地方上車。

無錯,事實的確係唔講真係無人郁。

我記得好耐好耐之前,當時仲未有依個廣播,每次放工時間係太子站轉車都見到好多未過河嘅卒仔。所有人直行行到去人龍後面就好似自動痴住左前面果個咁,如果佢肯行多幾步轉入去比較窄嘅地方等車,咁佢自己又易啲上車,後面等緊嘅人又可以行前少少。但事實係窄嘅位根本無人會行入去,個個一落車向前行之後就好似唔識向左向右行咁,同未過河嘅卒仔有咩分別?

地鐵見到有咁嘅情況就開始加強「波板糖人」當值,不斷用大聲公重複又重複同一句野,不外乎叫人唔好超越黃線、上車之後行入少少之類。情況都慢慢有改善嘅,不過都應該用左成一兩年先多左人會行去較少人嘅地方等車。

最後地鐵就慢慢開始有廣播「請往月台較前位置候車,會比較容易上車」,最近仲大大隻字貼左係太子地鐵站嘅牆上面,依段說話好似一上地鐵就可以聽到落地鐵,但事實係好多人真係開始識向左右行,去少人嘅地方等車。

其實成句野都好低b,亦只係一個好普通嘅常識,但香港人就係踢一下郁一下,唔叫你去少人嘅地方就好似碌木咁企左係到,唔叫你上到車行入啲就真係個個都塞哂係門口扮沙甸魚,行入多兩步分分鐘連報紙都可以打開黎睇,但就係咁犯賤唔行多兩步。其實身邊好多野都係應該要知,但係唔去做,硬係要人不停講不停提不停洗腦先會去做嘅事,如果自己識早啲去做,早啲去發現,咁咪唔洗俾人洗腦囉。

 

本篇圖文獲作者墨者授權刊登,未經准許,請勿轉載!

墨者 Facebook:https://www.facebook.com/makzewrite

 

作者的其他文章:
>> 紀念冊上的一世朋友 

 

內容評分
評語