(真人真事)千祈唔好畀女友著和服!因為佢會覺得自己好靚!

文:
2016.01.26

文:藍橘子

 

 

 

排同女朋友小豆去大阪旅行,全個行程佢最期待就係可以喺京都著和服影相,同埋去環球影城,佢唔敢玩機動遊戲,只不過係期待影相。

 

喺出發之前一個月,佢上網聽聞和服如果想揀到心愛嘅粉紅色,就要早早預約定,仲一定唔可以遲到,如果唔係嗰幾件粉紅色和服就會畀其他人搶晒。

 

「粉紅色無咪揀其他色囉~」我。

 

「如果因為遲到而無晒粉紅色,我會擰甩你個頭!」女朋友咁樣警告我…

 

「紅、紅色呢?粉黃都幾襯妳吖~」我去間和服店個網頁睇,其實望落件件都差不多樣。

 

「完全唔同!一定要呢隻粉紅色!」佢差啲一隻手指戳穿個mon,究竟女生對於顏色執著到咩程度? 我發現男人大部分買嘢都會買唔同色,一來避免撞色二來見靚就買。但女仔好多都死忠一種顏色,就好似馬沙專用色咁。

 

為保住個頭,我已經一個月前預約定最早時間,務求和服店一開門就衝入去搶走女友專用粉紅色和服!

 

終於到咗當日,平時例牌唔知醒嘅佢晨咁早就雙眼發亮,沿途照鏡超過廿次確保瀏海可愛而且無分界。我亦都唔敢有半分鬆懈,望實個Google Map好似羅庚唔敢行錯半步路,當然啦臨出發前我已經檢查晒相機電池、RAM、即影即有相紙、手機電…

 

我諗如果去到先發現無相紙或者無電,我身上所有頭都會被逐個擰甩,立即擰甩晒亦得,甩咗…

 

結果,我成功咁準時到達,但入到去已經見到有幾個客人揀緊衫,嗰一刻我簡直緊張到忘記咗呼吸,直至見到排我前面個女仔揀咗件黑色,我當堂開心到想高舉雙臂喺店入面跑圈。而女朋友亦揀到佢嘅專用粉紅色,見到佢笑容燦爛咁行入去換衫,我亦鬆一口氣。

 

過咗大約三十分鐘,女朋友換完衫行返出黎,佢露出咗一個驚訝嘅表情同我講:「我、我真係好靚…」仲喺我面前轉咗一個圈…

 

「把握時間出去影相啦!」佢顯得非常雀躍,我亦準備好所有相機,諗住終於可以放下緊張嘅心情出發,但原來惡夢只係啱啱先開始。

 

行到第一個街口,女朋友就話:「影我著和服行路吖!」

「哦哦…」

影咗大約十幾幅,佢話:「你喺後面跟住我,影我行路然後回頭。我個頭扎得好靚啊~」

「OKOK。」

行到手信街:「你唔好掛住睇嘢啦,你影我睇嘢!」

「哦…」

「著住和服食雪糕真係第一次,影我!」

「呢個景襯晒和服,影啦!」

「嗱我行過去祈福你記住影我啊!」

 

當日我就好似個龍友咁,貼身追蹤住女朋友,每個姿勢都唔放過,影咗成千幾幅相。平時行一陣就嗌攰嘅佢今日由朝行到最後一刻和服店關門先肯去換返衫。

 

離開京都返酒店,小豆搖一搖我隻手:「不如下次你都著吖~」

「唔著啦,我幫妳影相嘛,和服綁手綁腳咁好唔方便。」

「但係你著埋和服,會襯托得我再靚啲~」

「……」

 

我相信佢已經走火入魔,所以千祈唔好畀女朋友著和服影相,因為佢會覺得自己好靚。

而最慘嘅係,你都覺得佢好靚,所以好樂意幫佢不停影相…

 

(下期預告:女朋友去環球影城…)

下集:(真人真事)千祈唔好帶女友去環影影城!因為佢會當自己係小朋友! 

 

本篇圖文獲作者藍橘子授權刊登,未經准許,請勿轉載!

藍橘子Facebook:https://www.facebook.com/BlueGodZi/

 

作者其他文章:

>> 對個男仔講「傻瓜」,殺傷力一定大過叫BB或豬豬 

>> 點用電話最慳電? 

>> 倒數最重要是當我數到0,身邊是妳… 

>> 坤哥,一個努力的最好例子

>> 我帶咗《一蘭》食糖心蛋送嗰包鹽返公司做手信!

>> 每個人,都想要一個好似阿強咁嘅朋友

 

 

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【限時搶⚡】健之堂袪濕茯苓艾草足貼!↓

↓ 含三大中草本配方!/ 有效祛濕毒袪水腫!↓

↓ 含三大中草本配方!/ 有效祛濕毒袪水腫!↓

↓【免費送🎁】SPY x Family藍牙音箱!↓

↓仲有兩款模型~ FANS必收藏😍↓

↓仲有兩款模型~ FANS必收藏😍↓