熱愛優質生活
首頁   \   港熱話   \   每次親戚問我讀乜都會覺得好煩

每次親戚問我讀乜都會覺得好煩

2015.12.23

文:哲學仔

網上配圖: riadsmarruecos

每逢見到啲親戚,佢地都會問我一個問題:「明仔,你讀緊咩呀?」儘管佢地上一次見面都已經問過我,但係今次唔記得左嘛。

問題係,佢地好似有腦退化咁,次次都問我。

雖然我好想問返佢:「咁你又讀咩呀?」但係出於禮貌同為左我阿爸阿媽嘅面,當然只好答:「哲學。」

佢跟住又問:「讀完哲學可以做啲咩?」「哲學又讀咩架?」

我好想講:「關你X事咩?」但係我忍住,答佢:「讀完哲學出嚟無話要打邊一份工架。」跟住我就睇到佢眼神中嘅睥睨,唯有喺心入面同自己講:「唔似架,喺美國讀哲學好吃香架,可以讀多個Law degree做律師,又可以做banker。」但我深知,屌,呢到係香港呀!

Well……第二個問題睇起嚟好易,Introduction to Philosophy都會教啦,但係其實比第一個更難,因為我根本唔識點對一班喺我眼中同單細胞生物無分別嘅人,用短短十隻字講解哲學係咩。

「哲學其實係用理性思考問題嘅研究方法……」我都未講完,佢就講:「原來係咁……碰!明仔,可唔可以幫我拎杯水嚟?」

好,佢已經幫我答埋第一個問題,原來讀哲學可以做waiter。

不過讀廢科都有讀廢科嘅好處,因為親戚問你讀咩科原來都分三個層次,第一個層次當然係我呢啲佢唔知你讀乜膠啦!

第二個層次,就係佢知你讀乜。

「強仔,原來你讀電腦架!我部電腦呢,唔知點解呢排好慢呀,幫我睇下呀!」

無錯呀,你用十幾萬讀個學位返嚟,就係幫你個都唔知有幾親嘅親戚免費整電腦,多謝都無句。

遭殃嘅當然唔只電腦啦!

「偉仔,你讀中文/英文/數學架,啱啦,我個仔有啲嘢唔識,你教下佢啦!」

呢個都未係最慘,最慘嘅係第三個層次,佢以為佢知你讀乜膠,其實佢識條膠。

「堅仔,你讀經濟咁叻仔呀!有問啲咩心水股票可以話我知先!」

喺呢一刻你當然好想話佢知:「其實我讀嘅係經濟,唔係先知呀!我知要買咩股票,仲使喺到同你條廢柴吹水咩?」

但你唔講得,你更加唔可以咁講:「其實我幾好340架!」340係乜?你都唔知,你只係知道你好想睇佢仆街。

你只可以話:「你真係識講笑。」

其實啲親戚真係咁關心你前途?大多數都話知你死呀!就算你死,佢地都只係關心要畀幾多帛金。咁點解佢地要問你讀咩?一來出於「禮貌」,二來就係睇下有無著數。

 

本篇圖文獲作者哲學仔授權刊登,未經准許,請勿轉載!

哲學仔 facebook: https://www.facebook.com/philosophyboy/

 

內容評分
評語