好心男請DSE考生食米線 好心男回應：想俾啲Support你地

又到DSE季節，社會上陸續出現好人好事為考生打氣。繼早前有愛心校工俾一百蚊DSE考生搭車後，名校Secrets上又有另一窩心事跡！

這位應屆DSE考生表示當日同朋友一齊食三哥，因為搭枱緣故同一對男女一齊坐，男仔好有禮貌雙手俾餐牌佢地，又同佢地微笑。之後考生同朋友一路食一路傾DSE問題，到旁邊男女離開時男仔就叫佢地DSE加油。好人好事又邊有咁快完，到考生想埋單個時，店員同佢地講個男仔已經幫佢地俾左錢，於是特登上名校Secrets答謝返呢個有心人。

而估唔到出post後竟然有緣比當日既有心人見到，佢仲係post下留言，叫DSE考生加油，問心無愧就夠！原來好心男事主係第一屆DSE考生，見到該考生同朋友就開始見返當年既自己咁，所以想「俾返啲support」佢地。留言一出即刻吸引到五千網民讚好！

唔少各屆DSE考生都有係post下留言，表示人間有情，仲祝男事主好人有好報添。希望呢種互助精神可以一直傳承落去啦！