連繫好生活
首頁   \   香港周圍遊   \   潮流興Earl Grey!周圍掃食伯爵茶主題甜品

潮流興Earl Grey!周圍掃食伯爵茶主題甜品

2015-04-11 10:49:35
唔知點解,係,唔知點解近兩年鍾意飲格雷伯爵茶(Earl Grey)嘅人越嚟越多,格雷成為咗潮人杯茶,曾經紅極一時嘅鍚蘭就係咁失咗寵,唔知點解。 
 
無他嘅,Earl Grey嗰陣佛手柑味嘅茶香真係幾減壓。正因為Earl Grey贏在隻香味,有人就攞佢去整蛋糕、雪糕、甚至係整Cocktail,以下幾款甜品,隻茶味隔住個Mon聞到。  
 
   
 
小知識:Earl Grey點解叫Earl Grey?  
 
唔知喎!Earl Grey相傳係指「格雷二世伯爵(Charles Grey)」,相傳佢有個中國朋友調咗呢隻茶畀佢;又相傳佢無啦啦倒瀉咗佛手柑油落茶葉度,仲夠膽死拎去畀friend飲,後來勁多人like;另外有茶商話係格雷親自畀recipe佢哋整;仲有版本話格雷喺中國救咗個細路,佢老豆溝咗呢隻茶畀格雷(...即係點呀?「你救咗我個仔,我都唔知點報答你好,你飲唔飲茶呀?」),問題係格雷都無去過中國,救條毛
 
你打「Earl Grey Origin」會搵到好多「相傳」,作文嚟,或有興趣自己望吓OED。

第 1 站 3rd Space 招牌Earl Grey Pancake

上環半山區Cafe「3rd Space」,開咗一年都無,越來越多人識,除咗因為佢選址寧靜,仲有就係個露天茶座,而十幾本Menu全用人手寫,好有性格。環境舒舒服服,做事又有誠意,去Cafe無非想要呢啲感覺。

呢度招牌主打Pancake,牛角包同All day breakfast等熱食。最受歡迎係個Earl Grey Pancake,半山價$108,貴到嗌媽咪,但佢哋用嘅Earl Grey茶葉除咗有柑果味,仲有薰衣草味,即叫即做,趁熱食落口,隻香味好出,裡面仲有藍莓粒。叫埋杯Earl Grey茶($35),灰式享受。

FYI埋,楊千嬅隻《好不容易遇見愛》MV同《分手100次》電影都喺度拍嘅。

3rd Space 地址及營業時間:

http://hk.ulifestyle.com.hk/spot/detail.html?id=ABdGDVo3BwtZEQNs 

內容評分
評語