相信所有小女孩由細到大都想做公主,今年就可以嚟屯門市廣場實現夢想!屯門市廣場以Disney《Dream Big, Princess》為題,係今個聖誕節為一家大細帶嚟6位迪士尼公主,仲有大量節目同活動等緊大家。
公主大駕光臨屯門市廣場,就當然唔可以失禮佢地啦,所以1樓中央廣場就化身成為公主嘅華麗城堡,當中包括6位公主嘅經典故事場景:白雪公主同小矮人係森林入面奏樂跳舞;灰姑娘等待佢最愛嘅王子;艾莉奧係大海中自由自在咁「散步」;睡公主係玫瑰園同小動物玩到唔捨得走;貝兒係煙花之下等待起舞;長髮公主樂佩以長長頭髮面對挑戰,期望大家同佢係天燈下得到上天嘅祝福。
見過一眾公主之後,大家可以上去夢幻嘅經典城堡。露台下係公主嘅客廳,係指定嘅日期仲會有「故事分享時段」,重溫公主們嘅故事。大人細路置身其中,回味童話故事嘅一點一滴。
此外,仲有一棵8米高嘅聖誕樹,設置係廣場中間 - 聖誕節吖嘛,點可以無聖誕樹嘅呢!金、銀兩色做主調,樹上面可以見到代表住6個公主故事嘅閃耀掛飾,南瓜、玫瑰花、小鹿圖案…小朋友見到一定開心。
睇完公主嘅靚靚裝飾,仲可以喺場內嘅「期間限定店」買到6位公主限量版精品。送畀小朋友做聖誕禮物就啱曬。
講咗咁耐,又話有公主嘅,佢地去咗邊呀?嗱,唔好咁心急,佢地依家出場㗎啦, 6位公主係指定日期,就會喺「公主見面會」中出現,由12月1日起,大家捐款港幣$50畀「愛心聖誕大行動」,或係商場內任何兩間不同商舖以電子貨幣消費滿港幣$1,000,就可以同幾位公主見面兼合照留念。哎吔,搞到我都好想快啲見到啲公主添。
除咗以上活動,屯門市廣場仲安排咗「奔跑吧!灰姑娘互動遊戲」同「長髮公主天燈許願城堡互動遊戲」呢兩個遊戲畀小朋友玩。有得睇又有得玩,今個聖誕,一定要去屯門市廣場啦!
Disney《Dream Big, Princess》
日期:即日至2017年1月2日
時間:上午10時至晚上10時
期間限定店營業時間:上午11時至晚上9時
地點:屯門市廣場1期1樓中央廣場
https://www.facebook.com/tmtplazafans/
Source : 屯門市廣場
活動資訊
- 日期2016年11月17日 - 2017年1月2日 11am - 9pm
- 地址 屯門市廣場1期1樓中央廣場