正在閱讀
老爺冰室

老爺冰室

2016.04.03

潮流興懷舊,服裝要穿古着,音樂要聽舊歌,連新餐廳都要玩復古,位於深水埗的老爺冰室大玩懷舊電影主題,等小編帶大家來一趟味覺穿越之旅!

 

冰室的門口設計非常有心思,仿照舊式戲院風格,牌匾除了「老爺冰室」的名字,還有「即日放映」的字樣,入到去餐廳,放眼所見四周都是舊電影海報和劇照,亦有不少昔日中外紅星的照片,好似李小龍、貓王皮禮士利、張國榮等,令餐廳的懷舊味道更加突出。

 

為了貫徹電影主題,餐廳周圍都放置一些導演板,客人可隨意用白板筆寫上心水戲名,等大家相機食先時,可以自編自導自演一齣飲食節目,相當搞鬼!不得不提一句,餐廳伙記們都非常親切,因為是他們主動向小編講有得咁玩法!

 

至於食物方面,部份食物的名稱都好有「電影感」,好似這裡的推介飲品有「馬卡龍男主角華田」和「馬卡龍女主角可力」,「男主角」是華田加胚芽底,「女主角」則是「好立克」底,上面鋪上一層忌廉,再灑上朱古力脆米,當然不少得主角馬卡龍,這個配搭非常創新,而且想不到會是普通冰室出品。

 

冰室推出了期間限定的「今期主角」套餐($52),包括一杯「馬卡龍男或女主角」和南非鮑魚芝士撈麵,你無聽錯,真係原隻鮑魚!伙記表示這個套餐只限新張期內推出,當這期入貨的鮑魚售罄,就未必再有此筍價套餐。估唔到芝士撈麵都可以食得咁矜貴,鮑魚炆得夠腍,雖然不算好大隻,但總算有咬口,芝士撈麵則算不過不失。

 

另一款推介飲品是「波波奶茶」,這款飲品有兩個奶茶色的大圓球,小編初時以為是雪糕,但其實是奶茶冰,將奶茶雪成冰,這樣凍奶茶就不會被溶冰沖淡,抵讚!

 

至於這道名為「焗保齡球」的菜式,聽個名真係唔知咩葫蘆買咩藥,其實它的做法即是焗農夫包,將大麵包挖空,入面放入咖哩牛腩飯,味道微辣,相當惹味,牛腩亦煮得夠腍,食完麵包入面的餡料,就可以將麵包醮上芝士汁吃,麵包本身焗得非常鬆脆,醮上芝士汁後就更香口。

 

此外,這裡有多款「最佳提名小食」,小編今次就嘗試了「老爺多士」($36),香脆多士上有茄碎、茄醬、黑松露、芝士和肉醬等材料,味道濃郁,以黑松露的味道尤其突出,多士整體口感豐富。

 

活動資訊