Foodies

藍田匯景商場向來有「東九龍葵廣」之稱，最近一間主打輕食的小食店Foodies 進駐，為區內居民帶來多個選擇。小食店之所以叫「Foodies（美食家）」，是因為老闆都是一班愛吃之人，而背後的廚藝顧問，更竟然是一名只得19歲的女大學生，勁！

走簡約風格的Foodies 主打外賣輕食，店內位置不多，只能容納2-3人堂食；小店還在初開業階段，平均等候時間大概需要10-15分鐘，想省卻等候時間最好預早order。

要數店內的皇牌小食，一定非招牌大啡菇莫屬！一共有4種口味，包括「菠菜芝士」、「番茄肉醬」、「流心蛋配Parma Ham」及「芝士通粉」，即叫即製（$16/個；$35/兩個連飲品）。大啡菇以焗而非燒烤的方法製作，更能鎖緊水份，食落份外juicy，輕輕切開蘑菇汁就湧出來了。

看似簡單的焗菇製作起來原來都幾花功夫！負責人每朝都會到街市選取新鮮食材，並預早回到店鋪準備；個人推介「菠菜芝士」和「番茄肉醬」口味，店員一早預先將菠菜和番茄打蓉，再分別加入牛奶+忌廉芝士和豬肉碎，口感配合大啡菇都是軟綿綿的，調味剛好沒有搶去食材的鮮味。

「流心蛋配Parma Ham 焗菇」則最俱視覺效果，流心程度掌握得十分好，上面灑上香草碎，屬清新之中。

想食得飽肚一點的話，可選擇「芝士通粉焗菇」；小食店在通粉中加入兩種車打芝士增加鹹味和濃稠感，再加入Mozzarella 包裹着每粒通粉，誠意十足。

Mac & Cheese 配焗菇創意分夠就夠，但略嫌調味太輕手，芝士份量也不太足夠，味道比較清淡，而且很快變得乾身，有點失色。

焗菇以外，迷你漢堡包也是Foodies 的人氣食品之一！選用日本進口的漢堡扒，混入牛肉和雞肉，幾多汁；加上小食店自家調製的漢堡包醬汁，香口惹味，合格有餘。

跟餐的話可配搭小食店自家製的薯蓉，以原個薯仔而非似坊間般用薯粉開水打成，真材實料。 

Foodies 的飲品和甜品亦有驚喜，推介的自家製飲品有芒果乳酪沙冰（$22），以冰凍芒果肉和乳酪打成，當中冰粒打得非常幼細，與飲品融為一體，即使放久了特飲的味道也不會變淡。

流心杯（$32）更是小食店的皇牌之作，杯底放入Homemade 心太軟，頂部放著一球曲奇雪糕，一冷一熱層次豐富。當中更加入自家製作的焦糖脆脆和焦糖香蕉，食落啖啖都是toppings，很滿足呢！

人均消費約$20-40，輕食店來講算合理，但比起該商場內的其他小食店，食品定價略高，估計會吸納到一班食得健康的上班族收工幫襯，區外的朋友放假都可以去一試。