正在閱讀
FAIRY KISS

FAIRY KISS

2016.08.03

淘大商場一向target 區內居民為主,餐廳多元化但價格算親民。最近一期商場中的甜品店FAIRY KISS 轉型,由乳酪店變身專賣雪糕,軟雪糕一支$8就有交易,開業幾日吸引到不少街坊去食飯後甜品。

店內最抵食的,非軟雪糕莫屬!軟雪糕一共有6款口味,包括「香濃牛乳」、「日式芝麻」、「黑白牛乳」、「焦糖脆脆」、「海鹽焦糖」及「朱古力曲奇」口味,牛奶雪糕最平每支只售$8,而其他加上toppings 的軟雪糕亦只賣$10。

軟雪糕每支都唧足3個圈,以$10有找這個價位來說,都幾抵食。

平就平,味道又如何呢?

原味牛乳雪糕奶味算香濃,不過細嚐下雪糕帶點粗糙冰感,追求極度軟滑口感的朋友可能會挑剔。

可供配搭的toppings 當中,部分由FAIRY KISS 自家製,包括焦糖脆脆和焦糖醬。原味牛乳雪糕配焦糖脆脆最match,脆脆新鮮製作無受潮「痴牙」;海鹽焦糖雪糕的甜味亦很討好,食落似拖肥糖。

黑芝麻雪糕呈淺灰色,質感則較軟滑挺身,製作時加入黑芝麻醬,味道天然濃郁但偏甜,食落跟冰凍芝麻糊有點相似。

軟雪糕以外,FAIRY KISS 亦有供應芭菲,軟雪糕下放有布甸和脆米等,當中以Tiramisu 口味較出色,底層的牛油蛋糕粒與Espresso 咖啡融合,牛乳雪糕表面灑上朱古力粉,小朋友和大人都喜歡。

另有即製窩夫拼雪糕,窩夫可選原味或綠茶味,這款綠茶紅豆窩夫拼牛乳雪糕較受女生歡迎,甜品一冷一熱,口感豐富。

不過窩夫的茶甘味未見十分突出,配合紅豆甜度亦較高,怕甜的朋友可請店員落糖霜時輕手一點。

店內的甜品師沖咖啡亦有一手,招牌作Rose Latte 香氣逼人,牛奶咖啡與花香味平衡,捧在手中慢慢享用暖意洋溢。

活動資訊