篤一篤小食館

慈雲山一帶出名多平民食店，開業多年的「慈雲山小食館」年初因老闆退休而結業，街坊一方面替老闆開心，另一方面表示很可惜要跟小食講bye-bye！

小編最近發現，店鋪原址最近換上新招牌，變成「篤一篤小食館」！

查問底下，發現篤一篤小食店的老闆當中，一位有開小食店經驗，自稱半個慈雲山人的他，小時候在黃大仙區參加制服團體，經常到慈雲山醫肚。而另有一位則是慈雲山街坊，由細食「慈雲山小食館」食到大，有深厚感情。

據現任小食店老闆所講，年初知道「慈雲山小食館」要結業時，已聯絡過老闆，希望頂手繼續做下去，不過被人捷足先登。最近見店鋪又空置，便再問「慈雲山小食館」的老闆，經他同意後，決定在原址再開小食店，售賣以往的深受街坊歡迎的小食，延續小食館的美味。

小食與以往價錢差不多，非常親民，相信人氣No.1食品和飲品仍會是「老蛋」、「老柴」、「翅公」和「聯合國」！

老蛋和老柴即是炸到表面「皺皮」的魚蛋和香腸，分別售$5份（五粒）和$3一條，平價小食最受零用錢不多的學生歡迎！

翅公（$20）則是飽肚之選！碗仔翅拌勻公仔麵夠足料，不過比較稠身，麵身太腍，未能掌握以前的味道。

小食店的精髓在於獨門醬汁！篤一篤小食館暫時只供應秘製咖哩汁，香口但不太辣，蘸炸物十分惹味。

不過，若然想食到小食館的招牌甜豉油和沙嗲汁的話，就可能要等9月中正式開業啦！老闆表示現正等待以往在「慈雲山小食館」主理廚房的姐姐回歸，小編期待再次食到「沙嗲汁墨鬚」。

*小店仍處於試業階段，每日的營業時間可能略有不同，暫知開門時間為中午12時