東平洲 - 香港的馬爾代夫！（下）

上回提到斬頸洲，今日繼續介紹餘下既環島遊

過咗斬頸洲後，又番去樹蔭路段繼續前行，無耐就到了下一個景點「龍落水」，路段相當易行，因為只係平路，又有樹蔭，轉眼就輕鬆行到了！

話說點解哩度叫「龍落水」，係因為由高處望落去，岩石形成一個獨特狗牙形狀，一直伸延落海，就好似一條龍跳緊落水咁，名字由此得來

去到時咁啱撞到一個本地遊旅行團都來到，所以避無可避影到好多人

而當日烈日當空所以好多人都擔了遮

此時，其實算是圍繞東平洲行了半個圈，之前擔心天氣太熱帶不夠水，此時也開始安心，況且行完還可以去士多嘆杯超大芒果沙冰呢！諗起即刻有動力，再回到樹蔭路徑前行，未幾就來到最後一個景點「更樓石」了

來到時，適逢又遇上另一個旅行團 (我認我怕多人，好想避開所有團)

哩度之所以叫「更樓石」，係因為有兩舊高7米的沉積岩石柱，豎立於海蝕平台之上，遠觀就像兩座更樓一樣，故得「更樓石」之名

聽聞早幾年仲有用哩個景點整過郵票添呢

其實來到更樓石之前，本應途經一度叫「難過水」，但因為當日實在太熱太曬，我們選擇了行較容易既樹蔭路線，SKIP了難過水了

難過水其實係沿海旁既一條路，全程幾乎無遮無掩，鍾意挑戰又唔怕濕腳既朋友可以試下

行咗大半日，又熱又喝又疲，所以我地決定躲在石蔭下食啲野，順便等旅行團走，石蔭下又望海，海風吹著真係好舒服，如果唔係要趕船走，真係可以留喺度訓個晏覺！

食完，等人群走了，當然少不了影D靚相留念下~

玩了好久，但礙於要趕5:15班船，所以我哋繼續行埋剩下既環島路，返番去碼頭，沿途在樹蔭下，有段路好多蟬叫，叫聲特別，原來佢係東平洲獨有既蟬！全香港其他地方都話搵唔到佢蹤影呢！雖然未見其身，但總算聞其聲，大自然真係奇妙！

行至尾聲時，已經遠遠望到人龍，當時以為佢地係另一班4點幾既船，點知原來係同一班船，但佢一早畀人開始上船，我地仲係遠處，加上未飲沙冰 (終極目標 ！！)所以我地照去番士多個位，但點知佢已經 準 備 收 鋪 喇！！！！原來佢地士多人都好似唔係住島上，所以都要早D收鋪，估計和我們同一班船出番市區呢，但明明問路時有伯伯話佢地係度住架喎？

Anyway.. 哩個故事係教訓我地，甜品唔好太晏才去食呢！

士多有得意圖案，可愛 ！ 

外賣了杯野飲後，就慢慢去番碼頭上船，當時只係5點，但船上已經幾乎坐滿哂人，好不容易搵到位，等到5:15就準時開船

是次旅程真係大開眼界，個人覺得最靚係沙灘和更樓石，可以準備多點時間喺度HEA和影相(有偷聽到旅行團到更樓石時講：『搞錯，哩度咁靚就留咁短時間，頭先個度咁廢就留咁耐！』我心想，人地旅行社都係想賺你錢咋！點會仲顧你想睇邊個耐D呢？)

* 編按： 到訪東平洲的朋友記得將心比己，保護環境同時尊重他人，自己垃圾自己帶走。

原文刊載自 MountainGirlHK，本篇圖文獲作者香港山女MountainGirlHK授權刊登，未經許可，請勿轉載。