正在閱讀
初嘗做BLOGGER既滋味…南朗山

初嘗做BLOGGER既滋味…南朗山

本人終於的起心肝去開一個BLOG去提醒自己放慢生活,

而又成日睇到其他Blogger都好努力去唔同既地方實現自己既夢想,

哈哈,與其羨慕別人,不如自己落實執行......

加上當係練習下本人既打字速度都幾好.

事不而遲.....介紹一個短途又岩一家大細,上至老人,下至寵物都行得既短途山

位於南朗山道既南朗山

記得我同朋友第一次行山都係行啲度,貪佢可以出身汗,又可以一覽海洋公園既景色

行既時間大約用左一個鐘,路徑都幾易行,一個人去行都應該可以,當然我唔鼓勵...

今次同個朋友食完晏,點幾鐘先係灣仔坐城巴75號入去

 

提提您

記住係陳白沙紀念中學, 南朗山道落車

之後您沿住新加坡國際學校-再見到金寶花園-東華三院戴麒趾安老院(興建中)

瑪利灣學校-香港青少年培育會

之後您會見到下圖景像

因為唔太多車,影了一張好難得既相 

緊記要注意安全

因為無咩車行,所以您可以好舒服甘欣賞風景

話說自己細細個都係住係黃竹坑,望住宜家既深灣同黃竹坑

真係好感慨自己童年同嫲嫲一齊生活既日子

請原諒我自拍一下;]

一路播住盧廣仲既慢靈魂真係好舒服

行左差唔多5至10分鐘,就會見到下面個指示牌

講明會出下汗架,但放心難度只是屬於小兒科,行大約10 分鐘,當然因人而異啦;]

但我見到一家人慢慢行都係用左20 分鐘到….佢地行下又停下甘

上到去就會見到啲健身設施,講真,景色同空氣質素一定好過 P字頭既健身室XD

大細路既我都玩左一款甘多…….跟住就真係行山啦….不過放心,條路真係好好行,

只要您唔怕行石級……我同朋友一路行,一路影下相甘…聽下歌,大約半個鐘到就到達目的地-南朗山亭

沿途風光美不勝收……又望到海洋公園…..真係聽到玩機動遊戲啲人既尖叫聲

跟住就會到左南朗亭

您可以選擇係啲度作終點,野餐又好,休息又好

但筆者我想出多一身汗,可以上第二個CHECK POINT …都係有石級可以到達,但路面比較多碎石,如果帶小朋友繼續上山,就一定一定要倍加小心

大約行多20分鐘到就會到達一片爛地,筆者我都選擇以此地方作結,因為晚上約左家人食飯,

係甘靚既環境食埋個飯團就沿路落山,希望第一篇會幫到睇緊既您地,如果有咩意見問題想問,歡迎留COMMENT,本人十分樂意吸取意見及解答,應承您地一篇比一篇好;]

 

原文刊載自 U Blog,本篇圖文獲作者 慢靈魂 授權刊登,未經許可,請勿轉載。

 

活動資訊