正在閱讀
山系旅行- 絕美芒草‧新手秋遊大東山二三事

山系旅行- 絕美芒草‧新手秋遊大東山二三事

大東山?最近好Hit 喎!

11、12月登山確係最好時機。

 

最近打開Facebook,見到一張又一張介紹大東山嘅相,我嘅心心眼又出動。

何解要11,12月登山呢?因為呢個時候山上芒草盛開,置身當中就好似一個仙景。

小G 一直都好想去大東山睇芒草,於是今年時機一到,真係「誓要去~~大東山~~」,無他,大東山真係好靚。

 

要挑戰香港呢個人人都話難行嘅第三高山,體能麻麻嘅我當然要做足準備,首先當然要清楚整個行山路線,而我就選擇咗比較「易」嘅方法。雖然係最易,但對於我真係好難、不停上又大又高石級,真係諗返起都怕怕。

 

較「易」上山方法:

1. 由東涌坐11,3M,23去到伯公坳(上車前同司機講提佢叫你落車)

2. 約15mins就到伯公坳,落車之後向前直行,會見到左手邊山坡上的涼亭

3. 見到南山經大東山路牌,一直向前行

 

之後就開始我每步難行之登山旅程,由於山級又多又斜,真係行十幾步就要停下休息,(太水皮了)

山上石級又高又斜,新手少d 意志、體力都唔掂呀!

由於以龜速登山,上山大約用咗2小時,雖然辛苦,但當見到眼前美景,真係超值得!

山上芒草真係好靚,香港有咁靚嘅景,當然要好好珍惜,天公造美,陽光加芒草,成個山都金光閃閃。

由於行比較易嘅方法,由伯公坳上到爛頭營之後,就回頭行返上山嘅路落山,因為行南山落山,聽講仲斜仲難行,對於新手來講,都係安全d好。(邊行邊休息,加埋休息時間,來回大約用咗5.5小時,大家都係預早d上山,真係入夜山無燈就好危險啦。)

爛頭營上有大約十多間小石屋,入面有 睡房、廳 、 廚 房 及 廁 所 ,有興趣的話可以租用。

 

個人心得回程嘅芒草加上陽光比去程靚,大家預留時間影多d相啦。

 

對面的山係香港第二高山鳳凰山

新手遊大東山有幾件事要留意:

 

登山前:

先做好資料搜集,明確知道行山路線

準備足夠食水、乾糧、電筒

秋天都要做足防曬,我就係掉以輕心,落山太陽(起右邊)好曬,搞到我右手變紅燒乳豬

女生可以帶一把遮,除咗防曬之作,以防萬一仲可以起山間「方便」之用

如果一向無咩運動,但又想睇咁靚嘅景,登山前記得熱身

準備旅伴,甘願興你同步以龜速同行,邊行邊影

 

登山時:

堅持、意志、體力缺一不可

唔好死頂,見唔對路就要休息

欣賞美景之心

公德心,有垃圾記得帶落山,唔好破壞大自然

都係公德心,登山當日有小數人「炸機」,迫住全村人同分享佢嘅MP3 Playlist(呢樣嘢對我來講真係幾討厭,登山無非都係想清靜地欣賞大自然,點解要迫人聽唔屬於呢一度嘅聲音? 要聽音樂,請帶上耳機!)

 

登山後:

拉拉筋,唔好即時坐底,上山落山大小腿會有d軟,伸伸腳第2日無咁酸疼

補充水分

按摩膏(我大腿痛咗足足3日,頭3日真係完全上落唔到樓梯 >< 睇嚟要練多d)

睡前可用枕頭整高對腳入睡,第2日無咁酸疼

登完大東山,我真係好感覺又開心,因為終於圓咗心願睇到咁靚芒草,而且,體能水皮嘅我竟然可以連續2小時行上石級(當然有小休N會),始終要錫住自己。

 

大自然比咗咁靚嘅禮物我地,其實我地都好應該為佢做返小小嘢,記得要愛護佢呀! 

 

原文刊載自 U Blog,本篇圖文獲作者 Lazy G. Lazy Place 授權刊登,未經許可,請勿轉載。

 

活動資訊

免費登記成為U Lifestyle 會員
即時接收最新資訊並盡享獨家優惠

免費登記成為U Lifestyle 會員
即時接收最新資訊並盡享獨家優惠