豬軟骨、炸雞有驚喜！荃灣人氣雲南米線店回歸

讀者報料，一間深受街坊歡迎的米線店「老闆娘雲南米線」，最近重返荃灣香車街街市再次開店，日日做到無停手，顧客想食都未必食得到。

小編今日就走入荃灣，測試一下要排幾多分鐘，最重要的，當然是一試這碗人人排隊等食雲南米線！

米線店每日11:30am 開始營業（逢星期三休息），小編12:05pm到達已幾乎滿座，被安排坐於無冷氣的位置，不過天氣涼加上有大風扇，不感悶熱食慾沒有被影響。

雲南米線有兩款價錢，$38米線可跟肥牛、滷汁小食、炸物及餃子等小食；如果點選$48那款米線的話，則可選擇製作較花功夫的餸菜，如涼拌麻辣金錢肚、水煮豬膶、蟲草花薑酒牛肉等。

每加一款餸，將額外收取$$8，每人最低消費一碗。

聽街坊介紹，小編就點選了人氣最高的「雲醬豬軟骨」拼「反斗蝦膠豆卜」麻酸辣湯米線，盛惠$46。

眼看廚房員工不多，只有2-3人，加上顧客數目極多，樓面職員都溫馨提示等候時間或超過30分鐘，讓顧客有個心理準備，也避免令趕時間的食客撲空。

等了大概35分鐘，終於有得食啦！米線大大碗份量十足，麻酸辣湯的香氣攻入鼻腔和口腔中，不禁分泌大量口水；米線軟硬度適中，秘製湯底中有大量蔥花、韮菜、芽菜及肥豬肉碎等，非常香口。

小編點選了小辣麻酸辣湯底，食兩啖嘴唇已有麻痺的感覺，加上酸辣的惹味，愈食愈刺激！

餸菜方面，招牌之作豬軟骨果然令人驚喜，肉的部分炆得軟腍，而軟骨部分仍保持爽脆，非常入味，必食！

以細碟另上的蝦膠豆卜雖然炸得香脆，但略嫌太乾身，令蝦膠的鮮味被掩蓋，味道不過不失。

與朋友同行的話，可額外追加小食Share，推介即叫即炸的「招牌酥炸雞球」。$38一份有五件，炸雞熱辣辣非常燙口，炸粉薄，雞肉多汁嫩滑，好味！

現場的街坊均表示非常歡迎餐廳回歸，很開心可以重遇老闆和老闆娘，亦體諒等候時間較長。建議想一試這間正宗雲南米線的朋友，可於中午12時前/下午茶時段幫襯，或者待排隊潮過後才到訪。