30cm長巨型窩夫！旺角中心生力軍小食店

旺角中心又有新一輪小食店開業啦！

Nun Asia在12月初時於1樓食品區開業，小食店將韓國人氣街頭小食「長窩夫」帶來香港，口味比韓國當地百變得多，有鹹有甜，多達14款。

店內所有窩夫即叫即製，Nun Dessert特別訂製窩夫機可製作全條/半條裝，全條裝窩夫足足有30cm長！

趁窩夫還是熱辣辣的時候，店員快手快腳唧上忌廉或鋪上餡料，送到食客面前。記得盡快享用，避免忌廉全溶掉，令窩夫變腍！

窩夫不算十分厚身，仍能做到外脆內軟的口感，而且蛋香味濃，單吃味道已不錯。 

店內最人氣的口味，非這款「4重紫薯長窩夫（半$32/全$48）」莫屬！首先在新鮮即製的窩夫上唧滿紫薯忌廉，再配搭紫薯蓉、紫薯粉、紫薯醬，好「薯」！ 

紫薯蓉比較滯，加上小店唧得幾重手，份量十足，建議3-4人Share一份全條裝。

其他受歡迎的甜食窩夫包括D24榴槤（半$38/全$52）、Tiramisu（半$28/全$43）和時令的栗子口味（半$32/全$48）。

比起甜食，小編更推介鹹食的長窩夫，配搭更有創意。

首選這款韓風十足的「辣醬炸雞窩夫（半$32/全$48）」，切粒即炸炸雞加上爽脆的生菜絲，中和油膩感，最後淋上香辣惹味的醬汁，必試！

怕辣的朋友則可試試「黑松露醬沙律碎蛋窩夫（半$32/全$48）」，熱辣辣的窩夫上鋪滿綿綿的蛋沙律，一啖食盡冷熱滋味。

窩夫以外，Nun Asia亦有供應不少小食，推介這款「菠蘿雞肉串（$30兩串）」，表面炸得香脆，內裡鮮甜多汁。

*點選小食的話，可加$15追加梳打特飲