[深水埗] 康瑞涼茶 ‧ 中醫館內的隱藏版台式糖水 | 特色仙草百配好好食呀!

在深水埗食完泰菜後，意猶未盡梗係要食個飯後甜品。每次去食晚餐前，小妹都會預先揀好某間甜品店，就好似今晚就揀左呢間可以叫隱世但又唔隱得晒既糖水店。位置係深水埗一間賣涼茶的中醫店內，小妹都係經由網上先知入面有糖水食，仲要係台式糖水，足料又抵食咁話! 

其實位置有點偏，位於醫局街某間不太起眼的涼茶鋪 (仲要咁岩最新有人搭棚)，就係佢喇康瑞涼茶! 七點多去到，只有我們一檯客，本身室內都只有約三、四檯座位，後黎直情坐滿，要老闆娘係出面開埋檯，認真厲害!

(店主話平時開2，3點鐘架，所以唔好太早去撲空啊) 

糖水款式一本相簿睇晒，即叫即整，包括有特色仙草百配、雪耳湯底小丸子、紅豆沙配小丸子、椰奶紅豆沙、椰汁西米露、酒釀桂花湯丸、薑汁湯丸、蓮子腐竹蛋、海帶綠豆沙等，仲有糖不甩、手工咸肉棕和什果啫哩。而且價錢實在太佛心了，都係約廿蚊碗，超抵食的說! 

裡面有兩種芋圓、仙草、薏米、紅豆、西米、珍珠，椰汁底。芋圓煮得軟硬適中，食落有咬口；紅豆煮得夠綿，仲有食落涼浸浸既仙草，口感豐富得黎最重要係好食! 

整體黎講又平、足料又好食! 雖然好誇張，但小妹真係食到停唔到口，小妹好少會一路食一路點頭架。而且賣廿蚊咋，真係好抵食! 

原文刊載自U Blog，本篇圖文獲作者 糖小妹搵食軼事 @U Blog 授權刊登，未經許可，請勿轉載。