超邪惡！$32激食Note 3咁大件嘅炸雞髀！！萬芳冰室

好多人入元朗食茶記都話要食華嫂乜乜乜，嗰個有齊蕃茄、煎蛋同芝士嘅招牌菠蘿包大件夾抵食，又確係幾吸引，再加上佢最近衝出元朗，喺觀塘開分店，更加名氣極盛！不過有時入元朗屏山食華嫂都要撞啱時間，加上星期日人氣咁旺、大家又放假嘅日子佢又唔開，啲傻豬豬唔做定Research，入到嚟先摸門釘都幾失望架！不過小妹覺得元朗值得食嘅茶記何其多，唔食華嫂咪食第間囉！好似呢間位於元朗建德街嘅「萬芳冰室」都係假日嘅好去處！ 

Tiffany 藍嘅設計獨特，傳統中帶點時尚！ 

店內特設卡位，牆上仲有充滿懷舊氣息嘅壁畫，柯德莉夏萍同亂世佳人都係經典中嘅經典！ 

嚟幫襯嘅主要都係附近嘅街坊，而且高朋滿座！

雖然「萬芳」嘅位置都係有啲隔攝，不過小妹一諗起佢個「生炸無敵大雞髀」即刻食指大動！「萬芳」主打茶記懷舊美食，好似紅豆冰、菠蘿油、蝦多士、大件夾抵食嘅常餐… …全部都可以滿足一班老街坊嘅需求！不過我呢啲妹妹仔梗係鍾情炸雞髀同紅豆冰啦！ 

生炸無敵大雞髀   $32     炸到金黃色嘅外皮咬落「嗦」一聲，童叟無欺！

「萬芳」嘅炸雞髀真係唔講得笑，一上枱個陣勢就拋到你個心離一離，極大件雞髀炸到熱辣辣，陣陣熱氣同香氣撲面而嚟，咩叫即叫即整？佢完全用行動同實物話你知！朋友將手上嘅Note 3攞出嚟對比，件髀直頭大過佢部機，搞到我仲以為食緊德國鹹豬手！我即刻忍唔住要切開件炸髀，點知發出「嗦」一聲，香脆嘅外皮下肉汁同油份傾巢而出，邪惡度簡直爆晒燈！雞肉食落又嫩又滑，仲充滿彈性，完全唔同連鎖式快餐店嗰啲炸到又鞋又硬嘅炸髀！不過我最鍾意食佢配埋嘅雜果沙律，酸酸甜甜可以解膩，如果想飽肚啲都可以配炸薯條，$32就可以食到咁正嘅下午茶餐，行遠少少嚟食都係值得嘅！ 

攞部Note 3出嚟比拼吓就會知有幾大舊！！！！！

食炸髀點可以冇紅豆冰？紅豆煮得腍之餘又粒粒分明，咬落煙韌軟糯，加入香甜嘅花奶同搓成圓球狀嘅碎冰，夏天飲番杯都幾正！小妹發現「萬芳」嘅紅豆冰花奶同紅豆嘅比例接近1：1，根本係揼本之作，難怪每枱都差唔多嗌一杯。加上佢嘅糖份唔多，飲落唔會過甜，啱晒我呢啲「偽On Diet」嘅講（港）女！ 

紅豆冰 $20　　紅豆多到咁，會唔會蝕本？ 

紅豆粒粒都勁大粒，腍得嚟又有咬口，一個字，好正！

朋友叫咗一個港式All Day Breakfast ——常餐，鮮牛湯意粉清清地易入口，店主有特別加入薑絲，我諗係想辟走牛肉獨有嘅腥味，不過朋友話牛肉食得出係新鮮嘅，因為彈牙又Juicy！另外仲有傳統常餐必備嘅牛油多士、午餐肉同炒滑蛋，配上香濃凍奶茶一杯，呢個配搭，絕對唔會比文青成日蒲嘅Cafe輸蝕，坐喺度扮吓附近嘅街坊，又同啲街坊吹吓水，呢啲咪係食茶記嘅浪漫囉！ 

豐富常餐 $40（凍飲加$2）

原文刊載自UBlog，本篇圖文獲作者 港飲港食．講女 / 港飲港食．講女Facebook專頁 授權刊登，未經許可，請勿轉載。