正在閱讀
抵食到離晒譜!爆蛋三文治火拼$23魔鬼紅豆冰!上水廣成冰室

抵食到離晒譜!爆蛋三文治火拼$23魔鬼紅豆冰!上水廣成冰室

知道廣成冰室嘅存在,係小妹要做一個有關甜品嘅Project,素聞廣成嘅紅豆冰係一大賣點,於是慕名而來,一睹呢個人手刨冰甜品嘅風采!位於上水石湖墟新成路嘅廣成,由第一代負責人崔廣成於1962年創立,至今已經擁有53年歷史,係現時香港碩果僅存嘅傳統冰室!甫踏入門口,你會見到懷舊式吊扇、紙皮石地板、阿爺年代嘅噼啪電制同手扭式風扇制,全部都係舊式香港風貌嘅再現!

呢度嘅伙計同一般嘅茶記冰室有別,態度份外溫和有禮,佢唔似澳牛滾水淥腳、方死你唔嗌嘢食咁強迫你三秒內落「柯打」;又唔似早市大排檔對你愛理不理,諗到天荒地老發晒霉都唔正面望你一眼。嚟到呢度嗌嘢食完全零壓力,就算你有選擇困難症都大把時間畀你諗,睇唔啱伙計轉頭再搵你。小妹睇嚟睇去,覺得茶餐($33)最啱食,於是叫伙計落「柯打」,發現跟餐嘢飲冇得轉紅豆冰,只能加錢另嗌,惟有將跟餐飲品拎走,嗌一杯熱奶茶,正當伙計轉身走嘅時候,小妹突然醒起朝早先飲完,於是又叫住伙記想轉熱檸茶,原本以為會畀人鬧一鑊,點知佢完全冇嬲,仲話:「阿妹,冇問題!」呢啲咪叫EQ囉!

紅豆冰 $23

紅豆份量佔4/5,多到以為飲緊紅豆沙!!!!! 

冰山即叫即刨,以人手操作已絕版嘅古董瑞典刨冰機將冰塊打成碎冰,再用錐體模子將冰碎塑成小冰山嘅形狀。

伙計先奉上一杯紅豆冰,小妹當堂O晒嘴,What?呢杯係紅豆冰?點解同我平時飲嘅咁唔同?$23一杯紅豆冰,紅豆竟然可以佔成杯份量嘅五份四?!我有冇睇錯?點解紅豆可以多成咁?點解嘅?點解嘅?難抵誘惑嘅我啜咗一大啖,成口都係煮得軟腍香甜嘅天津紅豆,大粒飽滿之餘又有咬口 ,面層嘅椰奶稍稍滲透下層,令紅豆有淡淡椰香,小妹直頭覺得呢杯唔係紅豆冰,係紅豆沙!而且係直達魔鬼級別!紅豆冰嘅冰山即叫即刨,只要客人一落「柯打」,水吧哥哥就會用嗰部需以人手操作、已經絕版兼停產嘅古董瑞典刨冰機將冰塊打成碎冰,再用錐體模子將冰碎塑成小冰山嘅形狀,插喺紅豆上!啱啱上枱嘅紅豆冰唔係太冰凍,客人要慢慢飲,等啲冰融吓,之後就愈飲愈冰凍,愈飲愈過癮!  

碎蛋三文治 

啲蛋多到爆出嚟,簡直係邪惡級!!!!

驚喜真係一浪一浪架!好戲在後頭,小妹嗌嘅茶餐包括碎蛋三文治同牛肉通粉,碎蛋三文治啲蛋可以話多到離晒譜!成個三文治畀啲蛋撐到脹卜卜,有啲仲多到跌出嚟,小妹見塊方包撐到咁行,咪打開睇睇囉!點知一睇真係大開眼界!!炒到熱辣辣嘅滑蛋大埋頭鋪喺方包上,飽滿嘅金黃色散發陣陣蛋香,小妹忍唔住大咬一口,OMG!啲蛋入口香滑,一啲都唔老,不過由於佢太滿嘅關係,小妹食到勁「呢Hea」,啲蛋跌到成枱都係,失禮失禮! 

牛肉通粉

至於佢馳名嘅牛肉通粉亦都值得一試,店舖定必選用新鮮牛肉,堅持唔用鬆肉粉,而係用天然醃料將牛肉纖維醃鬆兼入味,以確保肉質鮮嫩多汁細軟;通粉烚熟之後會放入雪櫃冷藏三至四個鐘,過吓冷河,令口感更彈牙;湯底只用簡單嘅油鹽調味,再伴以薑絲僻除牛肉嘅腥味,清清地唔會感覺太肥膩!

多人都話茶記冰室又娘又Outdated,但小妹一啲都唔覺,反而覺得價錢平民又有驚喜,其實香港嘅傳統冰室已經買少見少,如果大家發現樓下嘅茶記冰室依然存在,就一定要把握機會,好好享受茶記冰室嘅浪漫,唔好畀歷史嘅洪流將佢淹沒! 

崔老闆好客熱情,佢見小妹一頭金髮,仲搞笑地問我係咪外國返嚟^^

崔老闆話門口嘅噼啪電制同手扭式風扇制仲用得,只係唔合規格而被迫棄用。

廣成永遠都客似雲來,所以嚟到要預咗搭枱! 

原文刊載自UBlog,本篇圖文獲作者 港飲港食.講女 / 港飲港食.講女Facebook專頁授權刊登,未經許可,請勿轉載。 

活動資訊

免費登記成為U Lifestyle 會員
即時接收最新資訊並盡享獨家優惠

免費登記成為U Lifestyle 會員
即時接收最新資訊並盡享獨家優惠

相關文章