正在閱讀
【天水圍】型格手作甜品店

【天水圍】型格手作甜品店

 

日本綠茶粉、台灣麻糬、泰國藍豆花、比利時朱古力、油麻地果欄生果 ……如果你 BB 話要同一時間食到以上既甜品,缺一不可架喎,咁…點算好 ! ? 唔洗怕,有間剛剛開業型格手作甜品店可以一次過滿足晒大家願望 !! 

店外壁畫係人手繪畫,具濃厚日本風格。 

店內裝潢簡約,灰色主調配上木色椅桌,型格時尚,有置身日本拉麵小店感覺 ! 

由於當時時間尚早,可以趁機多影幾張店面相又唔怕阻到人。 

除特色手作甜品外,亦有中西式糖水選擇,總會揀到心水款式呀 !

由於選擇困難症又發作,唯有請老闆推介幾款主打手作甜品及飲品啦 ! 

等候時,得知老闆原來曾經留學日本及於台灣發展個人時裝品牌,甜品原材料都經他親自於當地挑選,半個地膽揀既品質都會有一定保證 ! 再經過多番嘗試調配出最合適比例,實屬誠意之作 ! 

紫黃特飲

自己飲品自己調!呢款充滿泰國風味既手調特飲有藍豆花汁(蝶豆花)、柚子肉、梳打水、檸檬汁,可以自己親手調配真係非常有趣~不過要留意有先後次序架 ! 

首先加入泰國梳打水,好多氣泡跳緊舞呀! 

再加入藍豆花汁。藍豆花花瓣泡水後,水會變成藍色,屬天然顏色。

藍豆花具有通血效用,因應個人體質而異,特別孕婦、行經期間女性或正服用通血藥朋友要注意呀! 

加入檸檬汁時候,神奇魔法一觸即發…… 

變成天然夢幻紫色,真係好搶眼 ! 攪拌後,杯底柚子肉加上檸檬汁酸酸甜甜味道相當清新 ! 剩下梳打水可以再多倒大半杯。 

宇治抹茶芭菲

足足有6層唔同材料既抹茶芭菲,超級邪惡呀 !! 頂層大眼仔正正係靈魂標誌,遲d 將會座陣甜品店。值得一提,紅豆、製作綠茶忌廉及綠茶凍既綠茶粉都係黎自日本 !  綠茶忌廉茶味甘香且甜度適中、自家製綠茶凍好彈牙,如果甜多少少會更加好 ! 

百利甜酒朱古力窩夫

窩夫鋪上百利甜酒做的忌廉拉花,如藝術品般有欣賞價值,真係好唔捨得切開佢……雪糕有4款可選擇,包括朱古力、抹茶、曲奇及芒果。 

新鮮即叫即整,可能要預番等候時間。而蛋漿則預先整好並預時間沉澱,所以窩夫內裡都滿滿的,不是空氣窩夫,真材實料呀!  與香濃百利甜酒忌廉味道好夾有股咖啡香,外脆內軟好好味 ! 一份有4件,記住叫埋朋友一齊食! 

抹茶麻糬窩夫

同樣即叫即整,用來自日本抹茶粉及台灣麻糬製造,再配上日本紅豆,賣相精緻 ! 起初以為碗裡係抹茶糯米糍,原來係獨立包裝雪糕,所以圓碌碌超可愛 ! 這一齊都是源於對食材衛生既堅持 ! 

抹茶味好香濃,甘香而不苦,抹茶控必食!

最令我驚喜係裡面既麻糬,煙煙韌韌又唔會膩,且每件窩夫都有,果然係必食推介 !! 

心太軟鮮雜果配雪糕 (限定提供)

驟眼望最大亮點係色彩鮮艷生果,全部由油麻地果欄新鮮入貨,芒果肉好甜吖 !

超強流心效果,直情做到朱古力拉絲呀 !! 比利時朱古力軟心味香濃而滑,但略甜。 

生果真係鋪得好靚,大家又要爭住影相呀、欣賞完一輪先食 !!  最後要再黎張大合照先開動…… 

非常欣賞老闆堅持採用品質上乘材料出品,實在係值得支持既小店 !

溫馨提示係記住帶多幾個朋友去食,因為窩夫比較飽肚!仲有帶定叉電器,因為影相都影到無電架會!睇黎其他糖水要下次先可以再試喇! 

稱之為「隱世」,因為甜品店並不是處於當眼位置,亦係老闆希望客人有種到此一遊放鬆既感覺!

天水圍西鐵站E3出口,沿扶手電梯落並行到圖中位置,跟住過對面馬路(聚星路)並向紅圈方向行。 

沿斜路向前直行,兩旁有當眼旗陣,大概3分鐘左右到。 

認住呢支紅色旗仔啦! 

頭先話咩圓碌碌呀? 係米講緊我……

原文刊載自UBlog,本篇圖文獲作者 為食貓呼嚕嘆世界 / 為食貓呼嚕嘆世界Facebook專頁 授權刊登,未經許可,請勿轉載。 

活動資訊