熱愛優質生活

【荃灣 一鍋堂】食足兩個半鐘!勁多湯底,高性價比火鍋!

地點: 荃灣眾安街55號大鴻輝(荃灣)中心11樓      荃灣區
開放時間: 星期一至日 17:00-02:30
電話: 2408 3771

雖然香港天氣越嚟越熱,但係對於香港人嚟講,打邊爐係無分季節,大家坐埋烚下烚下圍埋食先最過癮。身為荃灣友,想同大家介紹一間性價比好高嘅火鍋店,佢就係《一鍋堂》。 

一鍋堂位於荃灣嘅大鴻輝中心,呢座大廈每到食飯時間都人頭湧湧,淨係排隊上樓都要花唔少時間!(注意:上一鍋堂需排右邊電梯,圖中時間尚早所以未出現人龍) 

一鍋堂以任飲任食方式經營,但有別於一般火鍋店,佢嘅選擇多好多,淨係例牌湯底已經有成16款,仲有唔少特色湯底,好似馬來喇沙、東陰公、沙參肉竹鯊魚骨同潮汕湯等!佢仲不時有期間限定湯底,好似今次我就叫咗蕃茄牛粒湯同冬季限定嘅《椰子雞鍋》。(選擇兩款湯底要另加$50) 

火鍋料方面亦都選擇多多,個人覺得全部質素都相當唔錯。唔單止有其他火鍋店不常出現嘅配料,好似牛骨髓、秋葵同薑汁皮蛋貢丸,另外佢仲有唔少自家製食材,好似胡椒麵、粟米餃、孜然雞丸等。而最貼心係,佢大部分配料都可以選擇半份,咁就啱曬眼寬肚窄嘅你哋試多幾款啦! 

而蔬菜同飲品就放置喺出面嘅雪櫃俾大家自己拎!菜類全部都好新鮮,唔會有苦澀味,我都可以食到差唔多兩兜菜!而且擺設上非常乾淨企理,真係見到都開胃啲! 

以下推介幾款個人認為比較特別值得一試嘅配料俾大家:

真係花膠:超大塊,喺鍋入面吸收曬湯汁之後滋味十足

白鱔片:充滿魚油香味,細細塊,叫多幾碟都唔怕

龍蝦沙拉丸:食落甜甜地,但係唔知點解好似有少少wasabi嘅味道,感覺特別

薑汁皮蛋貢丸:配搭新穎,雖然皮蛋味唔算出,但因為有薑汁,所以味道會有少少辣,街外少見不妨試下

胡椒麵:入口煙韌,食到淡淡嘅胡椒味,微辣,不過份量無得選擇,細食朋友慎點

火鍋湯底可以自己加,另有木敦果茶,入口甜甜地,之後會有回甘嘅味道。 

甜品方面,有乳酪同雪糕機俾你自己玩!要幾多唧幾多,仲有朱古力碎同棉花糖等俾你加落去,增加口感。 

重點,呢度假期都只係$168(未計加一),唔單止環境寬敞舒適,而且仲可以食足兩個半鐘,唔駛趕頭趕命,食飽飽慢慢再嘆番杯雪糕吹下水都仲得,啱曬慢吞吞嘅我!

攞位貼士:

可以下載《FOODGULU》 App拎飛等位。親身試過二人同六人以上最易等,三至四位要等比較耐。另外要留意飛號,因為好多人拎完飛就走,試過叫飛號一次過飛左30幾個號碼!所以真係好想食嘅話,最好預早少少上去等(仲要計埋等電梯時間),再唔係就5點開門即刻walkin,有機會可以即入。

訂位經驗,預早一星期都已經full曬…呢樣就要大家親身試下,個人通常都係即興去食! 

原文刊載自UBlog,本篇圖文獲作者 女生。旅生 / 女生。旅生Facebook專頁 授權刊登,未經許可,請勿轉載。

內容評分
評語