懷舊扒房 最平一個扒 $38連餐湯餐包@佐敦牛屋餐廳

佐敦你會諗起邊間餐廳？澳牛？鄉川佬？定係狗仔粉？今日唔食呢啲！食有懷舊風味嘅扒房啦！ 

香港除咗金凰餐廳，仲有呢間貌似家庭式經營嘅扒房。未行入去，見倒門口嘅手寫餐牌已經聞到好大陣懷舊味道！ 

店舖唔算好大間，驟眼看應該只有50個座位左右。 

店舖設計非常簡單，只係牆身掛咗唔同嘅畫作、吊燈同埋放左幾支酒。雖然稱唔上精緻，但就令人感覺好舒服。 

行入鋪頭一坐低， 店員已經問飲咩湯，唔夠30秒啊，熱辣辣嘅羅宋湯已經放喺枱上面。

羅宋湯餐包

係街外面飲羅宋湯 ， 普遍都係比較淡口同埋偏甜。而呢度嘅羅宋湯有少少辣，亦有大大嚿牛肉，足料之餘好夠味！ 

由於係第一餐 ， 所以就叫咗西冷跟薯菜。

黑椒西冷($49)

黑椒都幾辣喎！而牛扒都ok滑，唔鞋口。由於係午市，所以牛扒其他餐廳一樣都係選用薄身嘅。對於49蚊有呢個質素，我覺得可以接受。 

最後想買杯餐飲冬華田！用咗茶記嘅水杯，果然懷舊味重！ 

ps 各位不妨上openrice 望下！原來佢仲有焗威靈頓牛柳($188)而且好評如潮！真係好期待下次再去啊！ 

原文刊載自UBlog，本篇圖文獲作者 港女食食食 / 港女食食食 Facebook專頁 授權刊登，未經許可，請勿轉載。