正在閱讀
$35任飲任食!太古平價自助早餐DIY星星煎蛋

$35任飲任食!太古平價自助早餐DIY星星煎蛋

2017.02.13

「銀杏館」荔枝角分店早前傳出「被結業」消息後,這間專聘用長者的社企愈來愈多為人熟識。

社企最近於太古開設分店「銀杏時光」,感覺時尚一點,店內分零售和堂食區兩部份,每晚甚至有歌手表演,很快就吸引到區內街坊幫襯。

餐廳由2月初起,更推出自助早餐,每位只需$28(另加$7茶錢),就可以於7:30am-10:30am三個小時內任飲任食。

埋單計落每位只需$35,跟連鎖快餐店一份早餐的價錢差不多,似乎幾吸引;小編日前就趁返工前,潛入試食早餐,睇睇有咩好食!

自助早餐採用自助形式,用餐前需自行到收銀處購票,之後就會被安排入座。

7:45am去到餐廳已坐了幾枱客,以熟客居多;自助吧上的食品均可任取,而每張枱都有取食物用的碗碟,店員都講解幾清楚,特別是一位叫Jessica的婆婆!

食品以熱食為主,不少為素食,朝早可以清清腸胃。主食方面小編個人偏愛炒麵和南瓜粒,炒麵幼細彈牙,雖然無肉但味道不「寡」;南瓜粥煮到軟綿綿,記得加上自家製辣菜脯,粒粒都脆卜卜又入味!

選用有機菜製作的沙律讓人驚喜,青瓜、番茄仔等都非常新鮮爽口,當中更加入少許清新薄荷葉,早餐食好醒神!

比較之下腸粉質素就麻麻,皮厚,而且在熱盤上太久變硬了;其他中式食品則包括饅頭、炒菜、蒸番薯等,還有每日精選湯水。

而西式食品方面,烘多士外,食客還可以自己煎蛋/炒蛋,趣味位加分!餐廳提供的星形煎蛋模很受歡迎,想用的話,要排一排隊~

至於飲品,無論是中式茶,抑或咖啡都任飲;$40有找,無限時食到飽一飽,很容易就回本,住附近或於區內上班的朋友不妨試試,順便支持一下社企。

-------- 

任飲任食時段:星期一至日 7:30am-10:30am

每位收費:$28+$7茶錢

*推廣期至另行通知為止

活動資訊