牛油果新食法！荃灣人氣店推出「另類」漢堡

位於荃灣的漢堡包店Burger Jobs，繼早前以蝶豆花製作Tiffany Blue 芝心雞扒漢堡後又再有新搞作，今次帶來早前於英國頗為流行的「另類漢堡」！

全新食品「牛油果軟殼蟹堡」，聽落驚喜不大，坊間也有不少餐廳將牛油果粒（或蓉）跟軟殼蟹配搭在一起。

睇真點，原來Burger店今次以新鮮牛油果代替麵包，牛油果一分為二，將去掉皮和核的牛油果直接夾住原隻軟殼蟹，驚喜十足。

軟殼蟹即叫即炸，取餐時熱辣辣，口感亦非常鬆化，唯獨炸粉厚了一點。

除了原隻即炸軟殼蟹，內裡還夾有青瓜、蕃茄、生菜，與軟殼蟹上淋有的芝士醬取得平衡，整體味道幾清新。

牛油果熟透軟綿綿，中間的軟殼蟹就脆卜卜，最好跟住店員的建議，大啖放入口歎盡各層。不過由於果肉實在軟腍得很，就算有餐紙包住，用手食都有一定難度。

全新「牛油果軟殼蟹堡」可供單點或跟餐，套餐配有薯角、沙律及汽水，薯角同樣即叫即炸，很香脆。（新品還在試賣階段，價錢有待更新）

Burger 店最近亦推出了「燒汁豬頸肉菠蘿漢堡（配薯角共$88）」，豬頸肉新鮮即煎，爽脆啖啖肉，與酸酸甜甜的菠蘿很夾，奈何豬頸肉不夠入味，有待改善。