2.5小時慢慢歎！太古$38起下午茶自助餐

繼小編之前率先報導的「$35任飲任食早餐」後，位於太古的社企餐廳銀杏館，由即日起將會把「任食優惠」推廣至下午茶時段。

星期一至日2:30pm-5pm，這間社間餐廳將增設「港式懷舊下午茶自助餐」，每位只需$38起即可任食2.5小時，等小編再次潛入睇睇有無伏！

跟早餐時段有點分別，食客被安排入座後，才會收取費用。

自助餐每日將供應約12款食品，當中包括沙律、熱葷、小食及甜品，輪流供應，食品取清後或會轉其他款式。

小編於2:45pm入座時，已幾乎滿座；據了解，餐廳設訂座服務，但只適用於在2:30pm入座的食客，留位時間約15分鐘。

事不宜遲，立即睇睇任食區！

社企餐廳向來以之健康素食作招徠，下午茶自助餐也不例外，供應多款新鮮蔬菜，如薄荷葉拍青瓜、番茄仔、沙律菜等等，全部由社企自家農場種植，款款都很新鮮，尤其是拍青瓜，十分爽脆。

熱食方面，餐廳提供幾款港式及傳統小食選擇，包括咖哩魚蛋、燒賣、碗仔翅、豉油王炒麵、銀針粉等等，熱辣辣，咖哩汁亦值得一讚。

薯角新鮮炸香，金黃香脆，好味！

甜品方面，除了傳統的馬拉盞、白糖糕、千層糕外，還有幾款西式蛋糕。切成一小一小件，可以一次過試多幾款，朱古力蛋糕Mousse又軟又滑，不太甜，值得encore。

番薯糖水也是人氣食品之一，煲內有大量煮得軟腍的黃心番薯，不過小編就嫌薑辣味不夠。

不似自助早餐，下午茶時段不設任添飲品，只得清水供應，扣掉一點分數。想追加飲品的話可加$10，推介足料涼粉紅豆冰，紅豆咬落綿綿的，一杯有極多涼粉，$10杯好抵飲！

大胃王未能滿於任食食品，可加$30追加一份西式主菜，如卡邦尼意粉和海鮮長通粉等，款式每日略有不同。不過女小編就覺得就算以下午茶buffet作為午餐，份量都足夠有餘，為免做大哂鬼，可以食一轉再決定追加與否。

----------------

每位收費

星期一至五 $38

星期六、日及公眾假期 $48

*免加一