熱愛優質生活

將軍澳新開食街5檔小食!試勻炸雞翼+手握壽司+芋圓麻糬 

地點: 將軍澳常寧路2號TKO Gateway地下    西貢區

將軍澳區的商場一個接一個,餐廳中離不開連鎖食肆;最近坑口一個屋邨商場中,就出現了一條美食街,較小型的食肆陸續進駐。

Food Lane美食街位於坑口TKO Gateway地下,於1月初開幕,內有多個食肆鋪位,不過現時就只有約3分1店鋪開業。

當中大部份為立食/外賣店,主打食品有炸物、壽司、台式飲品、泰國小食等等,等小編逐間試試有無伏!

第1站 - 豪園小食

由美食車殺入地鋪,豪園小食依舊主打單骨雞翼,即叫即炸金黃香脆。

原味($18)以外,小食店另有售賣車打芝士($25)、蒜醬豉油($22)口味,還有每日限量的鹹蛋黃脆脆一字雞翼($28),每份6隻。

炸雞翼沾滿鹹蛋黃,食落極之惹味,叫人食完一隻到一隻。

另有咖哩魚蛋、撈麵、豬扒包等小食,水準同樣甚高兼價位親民。

第2站 - Smuki

主打泡芙脆條的Smuki 亦都攻入將軍澳區,泡芙同樣在店內新鮮出爐,香氣逼人。

泡芙似曲奇皮,頗鬆化;期間限定的榴槤口味再度登場,內裡吉士濃郁滑溜。

新出的香蕉味味道則不太天然,略甜,不特別推薦。

第3站 - 籠町茶番

過江龍籠町茶番於美食街也設有分店,人氣烤麻糬串外,最新推出香港獨有的炸麻糬。

麻糬炸至金黃,較烤麻糬串有嚼勁;蘸上花生或配搭四重芝士醬料,甜食/鹹食一樣好味。

分店亦有供應季節限定的芋圓仙草($25),加上芋頭粒格外甘甜,想暖胃一點的話可加薑汁(加$3)。

第4站 - 鮪世市場

現正試業的壽司店鮪世市場,暫時只供應壽司和刺身,食材每日由日本直送很新鮮。

師傅特別推介店內原條切的拖羅,入口數秒就融化,而且非常鮮味。

海膽刺身和特大赤海蝦壽司的質素亦不錯,海膽清甜不腥,海蝦亦都幾鮮甜。

較親民的選擇則有三文魚籽軍艦、油甘魚壽司,燒玉子等等,立食店不久將來更會推出魚生飯,密切留意。

第5站 - 檸檬葉屋

同場亦有一間泰國菜外賣店,由於串燒並非即叫即燒,不夠熱,肉質亦較乾幸好有沙嗲汁搭救。

芒果糯米飯($35)中規中矩,芒果頗甜,勝在份量頗足。

據了解,更多新餐廳將於1月陸續開幕,區內街坊之後去覓食就會有多點選擇啦!

【精選推介】 

1月生日優惠!16個免費自助餐/酒店住宿/門票戲飛

屯門掃街6大美食 生炸雞槌+梳乎厘+粒粒芋頭西米露

尖沙咀放題新店8大亮點 送龍蝦/刺身/即開生蠔

元朗20萬呎免入場費農場!即摘即食日本士多啤梨

內容評分
評語