旺角$78甜品放題 90分鐘任食45款人氣甜品

 甜食控好消息！Nun desserts cafe (雪冰)為慶祝開業五週年，在旺角總店推出$78甜品放題，90分鐘內任叫餐牌上45款甜品，人氣甜品如窩夫、雪奶、軟雪糕、雪糕意粉等。

皇牌紫薯雪米糍雪奶，內層灑滿紫薯粉，保證每啖都食到紫薯味。

雪米糍煙韌，增加口感。

紫薯蓉味道天然，有綿密感，雪奶整體不太甜，推薦！

特級香滑醉人士多啤梨雪奶，士多啤梨十分香甜，而且夠哂大粒，好吸引~

窩夫即叫即製，建議選芝士蛋糕士多啤梨窩夫，上面仲有球雪糕，材料豐富。不過窩夫唔夠香脆，最好盡快食用。

軟雪糕有不少款式可選，重口味人士可以試試D24榴槤牛奶軟雪糕，除了內藏榴槤蓉外，上面仲灑上自家製榴槤粉，味道濃郁。黃金芒果軟雪糕就不太推薦，果肉較酸。

雪糕意粉外表幾得意，不過就比較膩，以放題來說不划算，可以不點~

加$15可任食小食，有鍋貼、餃子、芝士波等，味道質素一般，以$15來說都相當抵食。

放題入座時間為下午2點至6點半，不設訂位；為免浪費食物，第一輪落單每位限點一款，之後每次落單每枱限點一款，食完先可以再點。每位成人可帶一位小朋友(身高不超過120cm)免費一同享用。

留意放題價錢$78未含加一，若於週六日或公眾假期光顧則需另加$20，即是$98加一。