銅鑼灣新開平民價豆品店　$12超滑豆腐花+自家製滷水小食！

銅鑼灣搵食，尤其是甜品糖水鋪，較平民化的食店愈數愈少，一般都要走到銅鑼灣大商場中幫襯。

不過，最近銅鑼灣近時代廣場一帶就新開了一間豆品店「合和荳品」，主打自家製豆漿、豆腐花、豆品小食。老闆跟經營豆品老字號的朋友學師有成，加上老闆娘從小到大都愛吃豆製品，便決定膽粗粗在租金貴但人流多的銅鑼灣開鋪。

合和荳品選用加拿大黃豆，每日於店內磨漿製豆品。豆腐花（原味）最平$12就有交易，在銅鑼灣來說非常抵食。

天氣凍食熱豆腐花最適合不過！豆味夠，口感超滑溜，加上店員「片」豆花的手勢好，每片夠薄，放入口一下就滑進喉嚨了。

除原味以外，還有冬天啱食暖胃的薑汁豆腐花（$16）、薑汁紅豆豆腐花（$20）、紫米豆腐花（$20）等等。

其中，紅豆煲到粒粒爆開，軟硬適中，值得一試。

不怕冷揀凍食，可選擇配搭涼粉，清涼冰爽，凍豆腐花就比熱食的，稍為結實些許。

豆品店除了豆腐花外，當然少不了豆漿。除了原味熱或凍豆漿（$8）外，有不少配搭選擇提供，如芝麻、紅豆、紫米豆漿（$13）。

豆漿充滿豆香味。

小食方面同樣有豆品店必備的煎釀豆腐（$16），自家製的軟豆腐中，釀入手打鯪魚肉，煎至外層金黃微脆。

如果能放多一點鯪魚肉，相信口感會更佳，更鮮味！

比起煎釀豆腐，小編更推介滷水小食，有嫩豆腐和豆卜兩款，同樣吸盡滷水汁的帶甜精華，特別是炸透的豆卜！

另有豉油皇炒麵（$18）、魚蛋燒賣、蒸粉果等。