正在閱讀
灣仔西餐廳新推下午茶放題 $99任食Pizza、雞翼肉腸、意粉!

灣仔西餐廳新推下午茶放題 $99任食Pizza、雞翼肉腸、意粉!

2018.01.21

天氣凍胃口都會有所改變,食放題都未必想食魚生壽司等生冷食品,熱辣辣的Pizza、雞翼、意粉,又有無喚起你的食慾呢?

灣仔一間薄餅店Jacomax,今年即將再度推出西式放題,每位低至$99,即可於指定時間內任食多款Pizza、前菜、小食和意粉等等,還包含飲品(汽水一杯),價位相當吸引。

All-you-can-eat 西式放題優惠將於2月10日(星期六)推出,只限於灣仔Jacomax 分店供應;分兩個時段入座,午市任食70分鐘,下午茶時段的任食時間則為60分鐘。

任食食品有沙律前菜和數款小食,如煙三文魚沙律、火箭菜沙律、烤蒜蓉包、黑椒雞翼、德國腸拼盤和凍肉拼盤等。

沙律菜新鮮爽脆,淋上沙律醋後作為前菜幾開胃,亦可中和烤焗食品的膩滯感。

雖說是一人份量,但份量驚人,建議與2-3位朋友同行的話,點一份就好了,不然很快撐飽。

而小食方面,小編推介即叫即烤的黑椒雞翼和蒜蓉包;前者入味嫩滑,後者表面塗滿蒜蓉牛油,勁香勁脆!

食肉獸之選有烤香的德國腸拼盤和凍肉拼盤。

意粉則有3款,包括經典的肉醬意粉和白酒蜆肉意粉等,宜幾個朋友share一碟。

肉醬意粉的香草略嫌落得太重手,食落有少少苦澀味,蜆肉意粉的味道較佳。

主角方面,Pizza會定期轉款,每月供應約5款。

必點招牌薄餅「藍芝士蘋果薄餅」,餅底上鋪滿Mozzarella,再放蘋果薄片和香氣獨特的藍芝士,最後灑上白砂糖放入爐焗。

Pizza味道既帶甜,又有濃濃的芝士鹹香,難怪很多食客平日都一再Encore。

2月Pizza款式還有食肉獸最愛的「T-Rex」,番茄醬和芝士醬上鋪滿肉腸、辣肉腸、火腿,啖啖肉。

較簡單的款式有「傳統番茄芝士薄餅」和「松露飄香」。

Pizza原個上,每個7吋。

西餐廳的食品質素整體不俗,即叫即烤熱辣辣加分;不過以放題來說,每份的份量未免過多,想試多幾款食品,最好約多幾個朋友去開餐。

收費:

午餐時段(11:45am-2pm) - $128 任食70分鐘

下午茶時段(2:45pm-4pm) - $99 任食60分鐘

*另收加一

*2月10日開始供應,現已開放訂位

活動資訊