網民熱議:700呎舊樓同350呎新樓要點揀? 同一價錢下揀大單位舊樓定細單位新樓好?

文: U Magazine
2022.11.11

買樓當然會希望單位又大又新,但如果預算有限,大同新之間只能二選一的話,你又會點揀?最近就有網民喺連登討論區上發文,問喺相同價錢下,應該選擇大單位嘅舊樓定係細單位嘅新樓,因而就引起一眾網民熱烈討論,紛紛發表自己會點揀以及當中嘅原因!

空間大住得舒服最重要?要揀大型屋苑嘅舊樓?
樓主表示現時500多萬可以買到700呎嘅舊樓,新樓就只能買到面積約350呎左右嘅單位,而自己就會選擇住面積較大嘅舊樓單位,並會將舊樓單位裝修到靚,所以就問到網民嘅意見,睇吓大家會如何選擇。有網民就表示會揀舊樓,因認為空間大、住得舒服比較重要:「揀舊。生活太緊張,空間好重要」、「住過世唔走一定買舊,多間房用差好遠」、「同樣價錢,舊樓比新樓大100-200呎,綜合嚟講一定有大揀大,住得舒服最緊要,得個新字你住多幾年咪一樣會變返舊樓」,而有網民就指有小朋友的家庭會偏向選擇面積較大的舊樓單位:「睇需求,我自住,有個仔,唔想幫人供樓,想住得舒服大D(啲),又想平D(啲),唯有舊樓」、「有小朋友果(嗰)d(啲)家產(庭),我諗一般會揀舊樓,多間房比(畀)仔女,如果一樣價」。

亦有網民指出位置比較重要,若舊樓位置好,可勝過唔少嘅新樓:「location、location、location,30年中環樓>5年大西北」、「買舊樓要睇係咪靚區,新樓唔洗(使),舊樓係比較實用if區好」,有網民亦指出若舊樓為有妥善管理嘅大型屋苑,就算樓齡舊亦問題不太:「傳統大型屋苑個d(啲),其實管理保養得好真係唔知有乜野(嘢)煩,唔好拎d(啲)唐樓,海山樓個(嗰)d(啲)黎(嚟)講」、「舊樓個定義太大,買唔怕買,但真係要識買,買大屋苑,管理好既(嘅),個(嗰)d(啲)單棟樓唐樓就唔好搵黎(嚟)講,幾大都係假」

有網民認為舊樓空間大,會住得較為舒服。

亦有網民認為需選擇屬於大型屋苑的舊樓,有良好的管理以及保養則並無問題。

舊樓問題多多?日後難以轉售?
不過亦有住過舊樓嘅網民指出舊樓有太多如漏水等嘅問題,有得揀點都唔會再揀住舊樓:「住過舊樓,40年樓齡,大堂翻新過但係樓上d(啲)走廊呃唔到人,又有漏水問題,d(啲)𨋢又慢,有得揀一定唔會揀舊樓」、「舊樓種種問題真係住過,要自己落手處理過先會明。新舊私樓屋苑大單位細單位我都住過,我點都唔會再住舊樓。根本係兩個世界」,更有網民指出舊樓除咗問題多之外,將來亦難以將單位出售:「買舊預左(咗)住過世,下家接唔落手,除非靚價,一來你又住多十年八載,已經更加殘,爆水管電梯成日壞家常便飯,二來按揭期數隨樓齡縮短,下家要有返咁上下積蓄,三來下家點解要接你層爛殘樓?」、「舊樓你要留錢做裝修做大維修,仲要諗轉手問題,隨時貴過晒啲新樓」。

有網民認為舊樓殘舊又會有漏水等問題,在將來亦難以再轉售。

 

新樓有靚會所用?升值能力更佳?
亦有網民表示會揀新樓住,因認為新樓較高級較豪華,亦有會所設施可享用:「一定係一手x,high class D(啲),仲有會所」、「住新樓,一行入去大堂個感覺都唔同啦,光猛豪華咁多,又會(有)靚會所設施可以用,舊樓大啲都唔住,俾人住到殘哂點住得落人」,而有網民就認為住較細嘅單位更方便於打理:「我自己就唔鍾意住得大,打理好麻煩。夠住就得,兩個人400呎都夠。我老竇老母兩條友住緊千幾呎,見到佢哋間屋愈來愈污糟(年紀大健康開始差就會懶打掃)就覺得搵自己笨」,更有網民指新樓有更好嘅升值潛力:「睇你純自住定遲d(啲)會換樓,新樓升值能力比舊樓高好多」、「自用角度唔講,投資角度一定新樓」。

有網民認為新樓感覺更高級更豪華之餘,亦有會所設施可使用。

新樓實際會再細啲?會所其實用得唔多?
但亦有網民認為新樓面積過細,實際面積亦會比起數字形容上更細:「新樓既(嘅)室內地毯面積只有實用面積既(嘅)60-70%,所以新樓既(嘅)350呎=舊樓既(嘅)210-250呎」、「新樓細到x街,就算樓下有幾豪都無用」、「以前同屋企人住舊樓,而家搬出嚟租新樓,新樓真係好細,開頭住落覺有(得)夠用,住咗一兩年已經想換大啲,遲吓如果買樓都會買返舊」,有網民更指出其實會所設施並不會經常使用,好多時候等於白交管理費:「當你住多幾年豪華會所新樓,你就會發覺一大部份管理費係白交,供養一群廢柴,資助少數人使用會所設施,保養,更可恨係你自己要勤力番(返)工賺錢供樓又冇時間享用會所設施,早出晚歸只係對住3面牆同離地十九幾呎天花板.....」、「會所基本上得兩種人真係會用得多,退咗休/唔使返工,有小朋友,唔係呢兩類嘅唔建議白交管理費」。

亦有網民認為新樓就算有會所都未必會經常使用到,交管理費等於白交。

text/Jonathan
photo/HKET圖片庫

==========

同場加映:

【家居達人】跟家居維修義工隊上門!搶救廁所外牆滲水+更換霉爛電掣面板

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【限時搶⚡】健之堂袪濕茯苓艾草足貼!↓

↓ 含三大中草本配方!/ 有效祛濕毒袪水腫!↓

↓ 含三大中草本配方!/ 有效祛濕毒袪水腫!↓

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

↓透過發佈帖文賺取收入!立即參加!↓