阿哥要結婚買樓,父母要我夾錢畀首期 網民熱議:應唔應該夾首期畀阿哥買樓?

文: U Magazine
2022.11.25

香港有唔少人買唔到樓,原因可能會係因為無辦法儲到首期,但如果有兄弟姊妹要買樓又唔夠錢,大家又會唔會願意出錢夾首期呢?最近就有網民喺香港討論區上發文,指父母要求自己夾錢畀阿哥做買樓嘅首期,並大指呢個要求非常唔合理,從而引起一眾網民嘅熱烈討論:阿哥買樓應唔應該夾首期畀佢?

夾錢買樓唔合理?搬走而作對抗?
就樓主父母要求夾錢畀阿哥買樓一事上,樓主表示已經向父母表明自己冇錢之餘亦唔會去夾錢,認為阿哥要買樓並唔關自己事:「話咩佢要結婚買樓要我夾錢都痴(黐)線,佢結婚買樓關我鬼事?」,另外樓主亦指出正打算要求父母畀幾多錢阿哥去買樓,就要畀返咁多錢自己或將現居嘅單位留畀自己,認為咁嘅做法先公平。有網民就認為樓主父母嘅要求的確唔合理:「咁講真無理由你亞(阿)哥買樓要你夾錢,係咪寫埋你名先?」,有網民更建議樓主應該搬走:「搬出去,0毛家用,直接對抗」、「搬走啦,無喟(謂)爭執。唔係第日呀哥仔女讀書都要你夾,介意就唔好再傾,互不拖欠」。

有網民認為父母要求夾錢給阿哥買樓並不合理,應從家中搬走以及不再交家用以對抗父母。

買樓唔係必要?夾錢應該要加名?
亦有網民認為買樓並唔係必需,如真係要夾錢買樓的話,該單位應該要加埋樓主嘅名:「加埋你個名落去咪夾囉」、「層樓落埋你名就冇所謂!」、「買樓又唔係必需,可以唔買,點解要逼人夾錢幫佢俾首期?加名係最合理做法,保證(障)各方」、「家人有難,如病,夾錢都合理,買樓屬非必要項目,買得起就買,買吾(唔)起就吾(唔)好買,父母錢畀邊個都無權管,但要自己夾一份,最合理做法,加名,日後到自己要買樓,就按當時樓價,計百份比賣返業權畀佢」。

亦有網民認為買樓屬於非必要的項目,如真的要幫家人夾錢買樓,自己應成為業權持有人之一,以作保障。

阿哥將來會幫返手?兄弟姊妹亦會反悔?
而有網民就認為樓主現時肯幫忙的話,樓主阿哥喺將來亦都會幫返樓主,不必斤斤計較:「你窮嘅無工作咪直接同屋企人講囉,洗乜搞埋哂呢個家變嘅嘢出嚟呀,第日到你結婚你阿哥咪又係會夾錢比(畀)你做首期,斤斤計較為乜」、「其實佢幫過佢阿哥做首期,將來佢阿哥係無可能唔幫返佢,唔幫手將來啲大時節大家點相見呀」、「做兄弟能幫得就幫」。

不過亦有網民認為就算兄弟姊妹,都會有各種反悔嘅情況發生,樓主阿哥將來未必一定會幫樓主:「太天真喇,親生仔不如近身錢,更何況只係阿哥,到時阿哥就係唔幫返轉頭,咬佢食?」、「支持樓主唔夾,層樓都無你名,夾咩呀?講就講而家你夾份比(畀)阿哥買樓,第時你買樓時阿哥會夾返份。但係將來既(嘅)事無人知道,你阿哥反悔都得,你都無計」、「有啲唔幫就唔幫,如果唔係唔使唔(咁)多家庭糾紛啦,你睇啲post都睇到架(㗎),有啲就係反面算,一種米乘(養)白(百)種人咩性格都有」。

有網民認為一家人應互想幫忙,今日幫阿哥買樓後,他朝阿哥定必會回報,一家人不用斤斤計較。

亦有網民認為就算是兄弟姊妹,都不能保證將來會兌現承諾,隨時可能會反悔。

父母一般仲係重男輕女?長子嫡孫繼承多數財產?
網民嘅討論亦延伸到父母會如何分配自己嘅財產畀仔女,有網民認為現時大多父母嘅想法都係重男輕女及財產會主要由長子嫡孫繼承:「傳統父母財產都係比(畀)長子嫡孫繼承,未結婚無仔女應該分得好少」、「另一方面,層樓係老人家,你又係女,佢地多數唔會轉比(畀)你,無論年代點變,重男輕女的思想係唔會變的」,亦有網民認為就樓主的情況,樓主現時與父母現居的單位將來會留返畀樓主:「正常諗法,大佬結婚買樓搬出,細嘅留低同父母住,當父母仙遊後,間屋留返俾細佬」,不過有網民就唔排除樓主父母會偏心阿哥:「唔排除父母未寫遺囑就去左(咗),大佬再將舊居分一半比(畀)佢,又唔排除父母偏心,最後都比(畀)埋大佬」。

有網民認為父母們今時今日亦保留有重男輕女的思想,傳統父母會將大部份財產留給長子嫡孫。

text/Jonathan
photo/HKET圖片庫

============

同場加映:

【蝸居睇樓團】大角咀粉紅日系新婚愛巢 房中房和紙趟門夠慳位、中島開放式廚房

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【限時搶⚡】健之堂袪濕茯苓艾草足貼!↓

↓ 含三大中草本配方!/ 有效祛濕毒袪水腫!↓

↓ 含三大中草本配方!/ 有效祛濕毒袪水腫!↓

↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

↓ 首創含微量酒精代餐 / 嚴選高級可可粉 / 加水即沖即飲!↓