好多香港人都覺得抽中居屋，幸運嘅程度同中六合彩不相伯仲！不過原來去到揀樓階段，先至係最頭痛！有網民就喺香港討論區發帖，話有想買大單位嘅朋友中咗綠表核心家庭嘅第二粒珠，但發現當有優先揀樓資格嘅家有長者中籤者揀完樓，輪到自己嘅時候，應該只剩返一房單位，隨時仲要揀東涌樓……而家個心十五十六，究竟仲係咪應該把握呢個機會揀一手居屋？定係應該改用綠表買二手居屋呢？
優質同大單位 點都係會畀前面嗰2,700個長者揀晒！
樓主見到朋友好苦惱，但唔識畀意見，忍唔住上討論區發帖集思廣益：「好友抽了屋（居）屋第二粒珠（綠核家庭），起初全家超開心！中獎甘（咁）興奮，仲全部屋苑逐個實地視察（拉埋我去）。11月開始就居屋開始揀樓，才知道原來前面2,700個長者隊，輪到佢，就已經排到3,700幾了！估計只有買到1房單位，300尺左右，甚至有機會要去到東涌！全家陷入僵局（現住港島）！因現時就住300尺左右公屋，想換大一點居屋。如果要左（咗），就無了用綠表買二手居屋的資格，買二手居屋可大點，有選擇。如果吾（唔）要，就幾乎肯定呢世都無得再有機會揀一手居屋。依家呢個第二粒珠真係變左（咗）雞肋了！左右為難！佢都吾（唔）知點好，我更吾（唔）識得點給意見！」
點知即刻有同樣遭遇同煩惱嘅網民回應，話決定放棄揀樓機會：「我同你個fd 一樣，我前少少，綜排3,000， 但我決定舉旗放棄喇。 本身我就住九龍中， 如果無家長隊， 應該排前1,000位，肯定有市區大一房。只怪政府睇野（嘢）係倒轉諗，俾啲住緊樓既（嘅）老人家再用政府資源炒樓」、「我都係抽到第二粒珠，白核，初初很開心，但當我知道前面有2,700個長者，所以連審查表都無交，因為計過數想買的單位會俾前面2,700個長者買晒，不如房署將d 居屋淨係賣俾有長者囉。再者有些樓花期都成兩年，之後又唔知咩環境。早兩日八卦睇過，真係好野（嘢）大單位俾人買晒，得返d二百一百幾尺，所以我無後悔放棄」，有網友直言：「今次又真係好多人放棄！」
樓主朋友現住約300呎嘅公屋，希望可以買到較大嘅新居屋。
以家有長者資格抽居屋嘅2,700個中籤者會優先揀樓，好多人都話座向及間隔好、以及大單位，都會畀佢哋揀晒。
樓主朋友而家諗緊係咪應該放棄今次新居屋，日後再以綠表身份抽二手居屋。
抽到第二粒珠嘅機會 分分鐘一世人只得一次！
不過亦有好多網民覺得唔使太過苦惱，尤其是樓主朋友而家住緊公屋，無迫切換樓需要，既然未必揀到啱心水嘅大單位，不如下次再抽過：「其實有乜煩惱呢，佢哋就算今次買唔到，咪下次再抽過，最著數係住公屋嘅綠表（又可以抽綠置居），抽得到啱心水先至買都得，抽到前籌唔買又唔會收咗佢間公屋，有乜所謂呀！」、「有能力咪買2手，無就等60歲，或考慮新界樓，太細轉嚟無咩意思」、「就算綠置居都有1,200長者隊，好嘢俾人要晒，綠表唔急的話再等下期」，但樓主明白朋友嘅諗法，就係抽中第二粒珠嘅機會，隨時可一不可再：「每輪都係2,700個長者優先攞晒D靚既（嘅）或者大既（嘅）單位，但抽到第二粒珠就分分鐘一世得一次，佢都抽左十幾年啦！」
有身同感受嘅網友，話最後決定都係照揀東涌樓：「無計，我都係第2粒珠，開頭想要石門一房，但原來有2,700長者隊，真心灰，唯有選東涌3房或2房，始終真係有需要」，而樓主亦話朋友最後應該都係傾向「屈服」，考慮揀東涌樓：「唉！反正2,700都係長者隊，朋友就驚下次無甘（咁）好彩有第二粒珠，東涌都惟有諗下（吓）」。
好多網民都安慰樓主朋友，既然而家住緊公屋，無迫切買樓需要，建議下次再抽過居屋，揀到啱心水單位先買。
樓主話朋友覺得抽到第二粒珠嘅機會難逢，正認真考慮東涌嘅新居屋。
text/Joyce
photo/HKET圖片庫
============
同場加映：
【蝸居睇樓團】元朗60年村屋變童話式退休Dream House！特大玻璃趟門廚房連飯廳+二樓溫馨小偏廳
」，
App內睇文同睇片可隨時捕捉U Fun彩蛋，
換領現金券及禮品！
↓【送機票✈️】分享旅行靚相 贏免費機票↓
↓ 請您免費飛轉日／韓／泰！↓
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
