八十後神曲樂評：啲小朋友口口聲聲話自己聽張學友大，93年隻《我與你》你又聽過未？

文: C

好多八九十後就係咁，你問佢「張學友正唔正」，佢老梗答你正架，「歌神」喎你試下話唔正，但聽黎聽去咪又係《愛是永恆》、《每天愛你多一些》、《藍雨》、《分手總要在雨天》(《分手總約在雨天》係方皓玟囉唔該)、《祝福》、《吻別》、《只想一生拖你走》呢啲，頂多咪容祖祖今年Cover個隻《這麼近(那麼遠)》，仲有呢？仲有呢？

(發現一碌型棍！！！) 

拿，今日老編我私人醒隻正嘢，1993年佢出咗隻廣東碟《我與你》，裡面有首歌堅正，叫咩名呀？咪就係叫《我與你》囉！Track 1黎架，主題曲黎架，有無知音喺度？（利申：當年我屋企都有買，不過梗係唔係我買啦，我當年得五歲咋，係喇喎，五歲咁叻識聽情歌喎）

呢首歌真係十億個正，MV仲有白臉古天樂，奈何生不逢時，Wiki話，當年呢隻碟出喺兩隻國語碟中間，《吻別》同《祝福》，兩隻都係大佬級hit歌，搞到呢隻廣東碟無乜人提過，而呢隻碟仲有隻《只想一生跟你走》，呢隻主題曲《我與你》畀人冷落到梵高程度。

講返隻歌，係由日本人作曲，係改編歌黎嘅。J-POP曲風有個特點，首歌通常都好長，閒閒地4分幾鐘，呢首仲要去到5:56秒。點解日文歌咁長呀？因為日文字發音多呀，當「多謝」個日文係「多麼呀哩家拖個仔依媽事達」個陣，你叫日文歌點可以唔多幾粒音去填詞先？「我留著你在身邊心仍然很遠」改做日文，夠填個Subject都未到Verb啦。所以日本歌有時有個弱點，一個唔好聽，就係勁拖同重覆。

不過，講返隻歌，呢隻《我與你》好醒，佢一首歌分開三節，叫做「昨日」、「今日」、「明日」，三節完全唔同曲風，有快有慢好過癮，成6分鐘都唔覺長，開頭至1:48講昨日，個歌奇慢，因為講過去丫嘛，總係淡淡然，但之後好快好激昂，係當年中文會考《聽陳蕾士的琴箏》嗰種感覺。

隻歌講乜？就係講愛上一個人嘅經過，由有到無，由開始到結束到翻兜再結束，一首歌唱晒畀你聽，即係咩？即係唔理你有無拍拖都一樣入到你，咪係神曲一首囉！

一開頭係咁嘅：

「當我這天回憶　共你年月裡認識　

無盡甜夢你為我織

心靈留下痕跡　是你常令我獲益　

漫漫長路有你　讓我懂得愛惜

共經過　數不清的波折　

然後又經過　祝福與道別

然後又經過　想不到的轉折　

然後再一次相遇時　情是更加熱」

嘩你睇下啲詞幾90s（潘源良詞），呢首嘢文皺皺咁幾啱文青仔喎。

成段好似入左教會同Father告解咁，但係當你聽到瞓得之際，1:48突如奇來一下震憾性聲音，「現在就熱烈地說我愛你！」，嘩，醒晒！係.醒.Ｏ.晒！原來你搞咁耐就係想Fake我，想玩弄我，好衰架你啲架仔，寫首歌嚇死人嘅，好好玩咩？？？

呢段就係「今日」：

「現在就熱烈地說我愛妳！

現在就熱烈地說我要妳！

現在就熱烈嚷著　今日我衹想親近妳(hey!)

就讓夜幕下共對我與妳　

但願地面上若有我有妳　

真心的聲音高呼

今日我衹想親近妳(hey!)　

今日我多麼感謝妳(hey!)　

今日我但願留住妳~~~~~」

嘩你聽下段Chorus幾90s，個句「HEY!」真係唔該晒，聽到人想打爆個Mon但係又好想跟住唱喎衰嘢，歌神啲聲音由溫柔去到不知幾澎湃，聽到心跳加速是常識吧。

喂我真係好鍾意頭先個下震憾性聲音，點解？反差呀！有無玩過過山車呀？上去個下啲前戲咪慢到「誓願」咁嘅，其實就係為左第一下衝落去個下爽啲、High啲，呢啲就係反差！！反差是一種很玄的東西，例如你男朋友做嘢嗰陣好Man，對住你嗰陣就勁小朋友，浪客劍心咁款，呢種反差咪搞到人心心眼囉，絲打們你話係咪？

「若有一天竟講一聲再會是無期　

仍是愛妳愛妳愛妳癡心癡到死

也許終於衹可偷偷安慰騙自己

仍是與妳一起　

仍是與妳一起　

仍是與妳一起」

當年嘅Jacky仔越唱越強，連唱三嘢「仍是與你一起、仍是與你一起、仍是與你一起」嗰陣，聽到我「OH YES！OH YES！OH YES！」

或者，呢啲就係戀愛嘅感覺。

「現在讓我緊抱妳　一刻也未想失去妳

太美事難免有妒忌　也許終於衹有空歡喜

現在讓我緊抱妳　一生也願可擁有妳

那怕未來無法預備　這一刻總可貼於一起

現在讓我緊抱妳　一刻燦爛一生更美

那怕未來無法預備　這一刻衹知道多麼的

愛著妳　愛著妳　愛著妳」

聽住呢段，我明咗啲嘢，愛情去到一個位，就係大家發生咗好多事，又是非，又嗌交，不過呢，其實我仲係好愛你。原來戀愛最緊要係活在當下，講真架。

而Jacky仔把聲開始由頭先個「衝衝衝Mode」變返個男人仔，收細咗火，看透咗世事咁款。

佢之後又唱多次「今日我衹想親近妳(hey!)、今日我多麼感謝妳(hey!)、今日我但願留住妳～～～」我諗你而家都識跟住「HEY」喇，即係咩？首歌洗左你腦囉，你返唔到去架喇哈哈哈哈哈。

佢最後個「妳～～～～」字高潮完結之時，激情四射過後，睇住呀，條友要放灰喇，放架喇佢，最後一段「明日」係咁寫：

「這一刻像風中翻飛　明日變化總也要預備

回看昨日　每天都美　全憑是有你」

係，就係得咁短，因為明日都未黎，無咩好講。原來成首歌就係 FF 自己個前度，嘩！！咁你話喇，呢首歌仲唔係有無拍拖都啱聽？？有拖拍可以聽「今日」，「昨日」「明日」啱單身人士慢慢J，咁你話呢首歌唔係神曲係咩？

應承我，如果你想聽張學友，聽《我與你》。

應承我，如果你想聽《我與你》，唔好唔睇個MV！！！！嘩又係好好好好好正。

你見過白臉古天樂未？你見過白臉古天樂扮金城武未？你見過白臉古天樂扮金城武喺啟德機場同條女又掟煲又箍煲未？拿，未你就要睇喇。個Style呢，係就係「寶麗金」啲，但堅離地型囉。

有無人可以答我，一首曲詞編監MV都咁正嘅歌，點解YouTube點擊率得嗰一萬二千，啲Fans未食飯？掛住High Tea唔得閒？搵人Cover下佢得唔得？李逸朗去咗邊？

Loop多次先。

有機會再傾。

延伸：

http://zh.wikipedia.org/wiki/%E6%88%91%E8%88%87%E4%BD%A0 （維基《我與你》專輯簡介）

19張到肉廣東歌歌單　聽出80、90後成長歷程 (HK港生活編製)

相關連結：