千奇唔好教女朋友玩淘寶！

文: 藍橘子

【不知恥生活小事一則】10月12日（淘寶）

話說，今朝我未返到公司，老闆行咗出去Reception。」

「莉莉妹牙，我想問做乜呢幾日都有貨返？乜我哋有訂單咩？」老闆指著堆嘅門口堆貨。

「牙你老…」莉莉一抬起頭：「老闆係啊，啲貨全部係藍橙仔嫁。」莉莉指一指我抬底塞滿另一堆貨。

於是，我連早餐都未食，就畀老闆召咗入房。

「藍橙仔，你係咪好似Kelvin仔咁訂錯嘢，點解枱底咁多貨？我開過黎睇全部都係頸巾黎，我哋公司幾時有出頸巾我唔知嘅？」老闆以為咁樣反問好有霸氣，其實聽得多都幾憨…

「唔係啊老闆，係傻仔先會訂錯嘢。」呢個時候老闆探頭望一望Kelvin仔，佢又同部影印機耍緊花槍。幾乎每日，佢用親部影印機都會壞，我覺得Kelvin仔成日OT，佢同部影印機一定有段不可告人嘅關係。

老闆點一點頭，認同我講嘅野，又問：「咁你枱底堆頸巾係咩黎？」

「老實講，呢件可能係我人生中做得最錯嘅一件事。老闆你除咗同你老婆結婚之外，人生最後悔係乜？」

「請咗你。」老闆答得斬釘截鐵，我哋Dead Air咗十幾秒。

「咳…我最後悔嘅，就係教識我女朋友玩淘寶…我而家幾乎每隔一個星期就好似過一次聖誕節咁。」

「聖誕節？即係咩？」

「就會收到淘寶寄黎公司嘅禮物，但你都有眼睇，天氣只不過係凍咗少少，我女朋友就即刻買咗五條頸巾，我懷疑佢前世都唔知係咪長頸鹿黎。」

跟住我又話：「不過最恐怖嘅係，女朋友為咗令我唔發脾氣，每次都會買埋禮物畀我…你知唔知，用自己嘅錢買禮物畀自己，每星期一次，個心情有幾咁複雜…」

「…」老闆摸一摸佢唇上面啲鬍沉思，突然又話：「咁又點啊？！咁就可以當公司係淘寶收集站嫁喇！？我叫莉莉以後除咗公司貨之外，唔準收其他速遞！」

「你玩到咁絕，信唔信我下次等老闆娘上黎公司，我教佢玩淘寶…」

「……」老闆打咗個冷震，然後話：「以後收好啲貨，唔好堆晒喺門口阻住通道啊！」

「咁我出返去做嘢先，天氣凍喇，呢條頸巾送畀你。」

估唔到，老闆仔平時係威係勢，原來都係一個怕老婆淘寶嘅男人。

本篇圖文獲作者藍橘子授權刊登，未經准許，請勿轉載！
藍橘子 facebook: https://www.facebook.com/BlueGodZi/

HK 港生活 APP 登場！
Android 版：立即下載

Follow us:
即like UHK 港生活facebook, 追蹤城中大小熱話;
Instagram: @ulifestylehk