佳節，就唔好扮毒L啦

文：明月

佳節快來臨，黎緊有耶誕節同除夕，呢兩個被商業社會塑造為情侶拍拖嘅大日子。同時，又有成班人會係呢啲日子叫春，話自己係毒L，不停係Facebook share《Lonely Christmas》。

如果係真正毒L，自嘲下就無妨，反正大部份男人都係由毒L開始，慢慢學識脫毒，最後都識到女仔。但係好多偽毒人士，明明自己有女，可能只係個晚有事無街出，就叫埋一份話自己好毒；又有人食女無數，只係咁岩今年呢個時段single中，又話自己好毒。

其實大家有無諗過真正毒L嘅感受？　: (

個道理就有如有錢人話自己窮、瘦底女性話自己肥、考得好嘅人話自己無溫書，畀啲真窮人、真肥人、真成績差嘅人聽到係幾咁無奈同難堪。更何況，大時大節無街去之餘，仲要畀你班偽毒串，真係唔好受。

不如試下代入其他例子丫？財政司司長曾俊華講過：「我係中產，我都睇法國電影」之後，你有咩感受？咪虛偽、離地囉。財爺月薪係港幣32萬元一個月，我敢講係香港Top 5%嘅人，如果佢都係中產，咁我已經係負資產、破左產、陷家產。

平時玩玩下就唔緊要，不過呢啲大時大節，非毒L就唔好扮毒L喇，一來照顧下其他人感受，二來唔好搞到社會咁虛偽嘛。

本篇圖文獲作者是明月授權刊登，未經准許，請勿轉載！
明月 facebook: https://www.facebook.com/MoonlightNo14/posts/149423908759401?__mref=message_bubble