由初相識乜都「第一次」,演變成去邊都係「老地方」

文:
2016.02.26

文:藍橘子


最初同女朋友一齊,成個生活由一變成二。
覺得做乜都好有新鮮感。
 
「我哋第一次兩個人去睇戲啊~」
 
第一次同佢去睇戲,兩個人食同一桶爆谷,隻手唔小心掂到都尷尷尬尬咁縮開,又借勢話「係咪好難拎呢?我坐埋啲!」
 
拉起兩個座位中間阻鬼住晒嘅手柄,靠近坐埋去:「係咪易拎好多呢!以後都咁坐喇好無?」
 
老實講,中間支死人柄頂鬼住我背脊,座椅中間條GAP又搞到我兩瓣屁股一高一低,話舒服就係呃人,不過為咗靠近女朋友,無計…
 
「我哋第一次兩個人食打邊爐啊~」仲要係麻辣火鍋添…
 
去邊食飯都係一門學問,好彩我係垃圾桶黎乜都食,所以任得女朋友話事。佢好鍾意食辣,辣我唔係唔得,但我平時食開BB辣嗰吓慘呢,佢就食開中辣…
 
經過無數咁多鼻涕同淚水嘅洗禮之後,而家我都食到中辣,Yeah。
 
「我哋第一次兩個人去長洲啊~」自從佢試完長洲糯米糍之後,長洲就變成同女朋友嘅拍拖聖地。
 
一齊嘅日子愈耐,就愈多第一次。
兩個人去唱K,兩個人去網吧通宵打機,兩個人去旅行…
兩個人一齊做嘅每一件事,去過嘅每個地方,都好似被施魔法一樣變成「禁區」。
當我一個人就完全唔想去。要去,就兩個人一齊去!
 
漸漸我發覺到,我個生活又由二變返一。唔係變返一個人,而係同女朋友兩個人生活幾乎完全重疊,無辦法分割。
睇戲會自動痴埋一齊坐,會爭爆谷食,但最後都係食唔晒。
試新餐廳口味會100%一致,一齊讚一齊彈,去過嘅餐廳都充滿住回憶。
 
太子間「金鳳茶餐廳」幾乎每個月都會去,無錯啊扒無肉味又多鬆肉粉,坐得又逼,入面好似焗桑拿咁。
金鳳係第一次約會帶佢去食嘅餐廳,或者因為咁,我同佢都好鍾意去,食完個身又臭口又臭,但照樣捉住佢個頭黎聞。
 
好多人都驚時間耐咗會無晒新鮮感、會厭、會悶…
但其實由「第一次」變成「禁區」,最後轉化成屬於我哋兩個人嘅「老地方」。
又係另一種甜蜜囉。

 

本篇圖文獲作者藍橘子授權刊登,未經准許,請勿轉載!

藍橘子Facebook:https://www.facebook.com/BlueGodZi/

 

作者其他文章:
>>  點解我搞親乜爛Gag,女朋友都會笑 

>> 食譚仔悟出真諦,難怪我一直咁窮

>>(老實)我鍾意同女朋友傾電話多過whatsapp…

>>同女朋友鬧交唔緊要,唔好隔夜就得喇!

 

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【限時搶⚡】日清盈優青汁套裝!↓

↓ 日本製造 / 2款口味:清爽蘋果味、濃厚白桃味!

↓ 日本製造 / 2款口味:清爽蘋果味、濃厚白桃味!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

↓透過發佈帖文賺取收入!立即參加!↓