返工追求開心好幼稚嗎?

文: 9527
2016.07.20

文:HR熊-職場航行日誌

返工開心重要嗎?小熊由初出道到而家,心態三步曲咁改變。讀大學一考完final exam就極速搵工,經學校介紹好快入左一間MNC(Multinational Corporation)工作,人工福利吸引,永遠準時返工放工,份糧俾完家用可以自己洗,已經好興奮。對於職場初哥或者年青一輩,因為未有咁多工作經驗,set目標就算達唔到都有藉口俾自己重新黎過,所以工作上壓力有限。

 

由於未完全脫離學校既生活模式,會轉移著重與同事既關係,有唔明白能唔能夠得到上司友善既幫助,唔會一下子逼迫佢地做大人。所以做得開唔開心,對佢地黎講絕對係一個好強既推動力去take up更多責任,你會意想唔到有時一句既鼓勵,小小既零食哄下後生仔開心,係會令佢地努力行前十步,希望得到更多既認同和讚賞。而行前左又企唔企得穩呢,就睇上司既功力啦!

 

而一轉工無耐,心情好快掉落谷底,一來部門係好等用人之際請我番黎,二來公司文化係要求極高效率但俾到既資源少之少。除左第一日返工welcome lunch之外,以後既lunch通常都留係office咬個包就算,無計啦,日日俾人「卒」到得番個lunch可以用黎訓下回下氣。每日如坐針氈,驚死做錯野俾阿頭話我累街坊,寫花我apprasial……搞到每朝起身心情都掙扎一輪好想射波,直到踏入公司門口一刻要好大勇氣。開心?係咩黎架?如果唔係堅持想深入學多啲野,我一定好有霸氣衝入老闆房遞信然後好瀟灑咁走!可惜太細膽無「吉士」得個諗字,做左一段時間,俾老闆折磨多過學野,浪費青春。

 

同樣「食過夜粥」既打工仔可能認為返工為開心,根本係個幼稚想法。經過幾年既嚴刑洗禮,明白到係工作間追求快樂係一件好被動而奢侈既事,相比起,最現實既回報,每個月尾既穩定收入,唔滿足但至少安心。拎著呢一筆薄酬,可以選擇用黎做喜歡既事,無人有資格judge你既決定,有得揀先係真正既快樂嘛!久經訓練過既,一返到公司就識自動轉mode,對任何事都無所謂,唔想俾公司既政治活動同埋大帝們既無聊是非,騷擾到正常工作,可以大事化小,小事化無就最好。多餘既應酬唔會有機會見到佢地現身,安份守己夠鐘就會靜靜收工執袋走人,寧願存在感低啲,都唔想搏做多啲得到上司半句無意思既稱讚。

 

直到再轉番份穩定工既時候,唔多唔少睇透左,唔會再百分百在意係職場上既得與失,因為太多變數你控制唔到,將focus去番自己既生活同興趣上,就唔會咁易鑽牛角尖激死自己。慢慢適應左呢個諗法,返工會減少不安,自製開心感覺既。唔好再唔食早餐lunch一頭痛不停啪panadol,好好地對待自己身體。長命功夫長命做,做好左urgent既task就乖乖回家呼吸下自由既空氣。小熊曾經俾男友話得太多,唔識放鬆神經,放假都唔識happy到跳跳扎,我唔想再做隻悲情小熊啊!


 本篇圖文獲作者HR熊-職場航行日誌授權刊登,未經准許,請勿轉載!

HR熊-職場航行日誌Facebook:https://www.facebook.com/hrbear.dairy/

 

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓ 【您去玩我找數】勁送$1000旅行資助金💰↓

↓ 領取資助金,用$0去玩不是夢~↓

↓ 領取資助金,用$0去玩不是夢~↓

↓【免費送🎁】SPY x Family藍牙音箱!↓

↓仲有兩款模型~ FANS必收藏😍↓

↓仲有兩款模型~ FANS必收藏😍↓