置樂、華都、何福堂大排檔⋯⋯作為屯門人10個為屯門感到驕傲的地方

返工返學後同人講住屯門，第一個反應通常會係「哇好遠啊！」，同好多人嘅對話，就由住屯門開始。雖然平日跨區返工、返學雖然辛苦，但都很享受住在這裏。以下作為「屯門人」為屯門感到驕傲的10件事，各位屯門人，你懂的。

1. 過年熟食

過年過節，以往沒有太多商店小舖開門。但每年年初一，都有一班努力工作的人在友愛、良景等屋邨供應街邊小食，魚蛋、煎釀三寶等等，香氣滿溢，熱鬧非常，拜完年返屋企經過一定幫襯。奈何過去一年這些過年限定的攤檔被趕，未知今年會唔會聞到臭豆腐的香味呢？

2. 何福堂大排檔

無論你係咪讀何福堂，都一定去過何福堂食大排檔！係小學同學、中學同學的聚腳熱點。每樣大大碟穫氣十足，邊食邊飲支啤酒邊吹水，尤其坐戶外特別好氣氛。

3. 市中心、華都、新都、綿薈坊

與其話屯市係屯門中心，不如話屯市M記先係屯門中心。當年一句「屯市M記等」無人不識。穿過市中心，仲有新都、華都，係買衫、食平飯好地方。宜家都唔差，變成買手機殻、街頭小食集中地。另一邊則有綿薈坊。宜家甚至延伸至V City。

4. 置樂

男女老友、老士咸宜的地方。阿媽阿婆買餸黃金地帶。後生仔去麗寶長頸鹿買模型；後生女去萬寶買衫。最後齊腳仲有間天悅平打邊爐。 

5. 栢麗

補習社集中地，雖然無市中心咁旺場。但有幾間小食店賣魚蛋撈麵等深入民心，又平又好食。

6. 屯門碼頭

碼頭係屯門嘅清泉，仲有個商場冷麵Q餅。坐在海邊吹風談心，好多人嘅Puppy Love就由呢到開始。

7. 龍鼓灘踩單車

踩單車唔一定去大美督，屯門碼頭租架單車，踩到入龍鼓灘，見盡山山水水，一樣好玩。

8. 輕鐵

香港、九龍都搭地鐵，唯獨輕鐵得屯門、元朗、天水圍至有，由買飛至踏入橙色細少車廂，好多市區人都話「好特別」。

9. 搭巴士

一班朋友去邊到眾會，旺角、尖沙咀、銅鑼灣？對屯門人來說已經無所謂，因為都係要搭長途車，過海最多貴少少，但車途一樣。屯門人搭巴士仲有一項特別技能，就係無論巴士上瞓到幾死豬，到站前都會自動醒。瞓覺、追巴士已經難唔到屯門人，不過當遇上塞車，則永遠都咁燥底。

10. 燒野食

屯門係BBQ天堂，咖啡灣、青山灣、黃金海岸、小欖、龍鼓灘……無論霸爐或自助燒烤都有，一到中秋節仲人山人海，非常熱鬧。

雖然為屯門繁榮發展感到安慰，再唔會有人問屯門有無牛。奈何市中心自麥當勞轉位後就面目全非，周末走一轉避人避碌，深感無癮。但無論如何，屯門都是成長的好地方。