網民熱討:新界邊個地區最好住?青衣交通最方便?沙田最多好嘢食?!

文: U Magazine
2022.07.05

大家認為,點樣去判斷一個地區好唔好住呢?交通方便?環境清幽?配套完善?近日就有網民喺連登討論區上發帖提問,詢問眾網民認為青衣會否係新界當中最方便嘅地區,結果引起一眾網民熱烈討論,有人認為只係住近青衣港鐵站嘅先算方便,亦有好多網民認為荃灣同沙田配套更好,交通更方便,大家點睇呢?

青衣交便方便?環境清幽但冇娛樂?
樓主發帖詢問青衣算唔算係新界當中最方便嘅地區,並提出自己對青衣嘅睇法:「出市區九龍都好快,可以落荃灣或者葵芳,但最弊係成個青衣都係無野(嘢)食。」,有網民就認為青衣在交通上確實非常方便:「青衣叫做偏向中心位,去機場、油尖旺、西九、中環都好方便」、「青衣如果揸車係一流,去邊都快,係車位貴左啲」、「以我駕車人士嚟講青衣係超方便」、「出九龍油錢仲平過搭東涌線」,但有網民就提出青衣其實只有居住於鄰近地鐵站才算方便:「不過住青衣真係得青衣城左右隔離係方便,其他都係垃圾」、「青衣得地鐵站好住之嘛,上山個堆公屋居屋真係乜鬼都冇」、「青衣好x大,住青衣站先係方便」、「之前住青衣山頂,你老x明明荃灣係對面海,搭巴(士)去荃灣仲耐過搭巴士去沙田」

有其他網民則認為青衣相對上環境比較清幽:「青衣環境係幾清幽,又冇乜人,唔係荃灣逼到似旺角咁」、「(青衣)人口密度低,又真係幾好住」,但有網民就認為以環境來說,新界有更多地區比青衣更好:「青衣環境好過葵涌,但新界大把地方環境又好過青衣,話晒青衣有個貨櫃碼頭,多大車貨船出出入入空氣點都差啲」。另外有網民就認為青衣部份配套不足:「青衣相對靜靜地幾好,但你要shopping就多數要出區外」、「但區內基本上無野(嘢)食無娛樂,連外賣都無乜選擇」、「青衣食飯行街都無乜選擇,要去荃灣、葵芳搵野(嘢)食」,不過有網民就覺得青衣以整體來說為最好住嘅地方:「青衣跟東涌線真心方便......同埋冇咁嘈,有海旁、運動場、游泳池、圖書館,街市又大,食嘢雖然都係連鎖式,但都叫有唔少選擇,搬過好多地方,最好住真係青衣」

有網民認為青衣交便十分便利,尤其適合駕駛人士,但亦有網民認為交通便利則只限於鄰近地鐵站的住所。

亦有網民認為青衣環境相對清幽,比較寧靜,但在購物及用餐等方面的選擇並不多。

荃灣咩設施都有仲方便?沙田又方便又多嘢食?
網民嘅討論亦引申到邊一個新界地區比起青衣更加方便更加好住,有網民就認為鄰近嘅荃灣及葵芳比青衣更好:「方便就選葵芳、荃灣,點都唔會係青衣囉」、「住葵芳仲方便」、「海旁、運動場、游泳池、圖書館、街市,呢堆嘢荃灣有曬」,但有網民就覺得葵芳及荃灣人口太多,相對上比較嘈及擠迫:「通街都係人,又多車又吵,點住人」、「荃灣愈黎愈多人同逼,葵芳地理係好但近鐵得好舊既屋苑」、「青衣係算方便得來都算靜,比較少外來人,有陣時出去荃灣西食野(嘢),都覺得太多人好嘈咁」,亦有網民認為荃灣海旁經常有臭味:「荃灣海旁就算啦,臭到嘔」、「真心唔鍾意(荃灣),好雜,舊區有陣舊區味,新向海嗰啲又臭,前一排渣車過donki一開窗一陣好似放屁嘅味,唔明點解仲夠膽sell個海旁」

另外有網民就認為處於另一邊的沙田區更好更方便:「其實講方便,沙田應該方便啲」、「沙田大圍第一,交通最方便又多嘢食」、「沙田市中心世一」、「沙田大圍點都方便過青衣啦,青衣如果去九龍東好痛苦喎」,但亦有網民就並不認同大圍多嘢食呢個說法:「大圍多野食係都市傳說,除非你食開屎另計」、「睇落好似好多小店,其實啲質素一般般」,亦有網民以親身經驗反駁青衣更為方便:「兩邊都住過,青衣方便啲,不過住灝景灣嗰邊先係」

有網民認為葵芳、荃灣比青衣更方便,但亦有網民認為該區太多人,感覺又嘈又迫。

亦有部份網民認為沙田區才是新界當中最方便及最多餐廳選擇的地區。

text/Jonathan
photo/HKET圖片庫

========
同場加映
【蝸居睇樓團】土瓜灣納米樓變身屋主珍藏展示屋+建閣樓變工作空間

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓ 【您去玩我找數】勁送$1000旅行資助金💰↓

↓ 領取資助金,用$0去玩不是夢~↓

↓ 領取資助金,用$0去玩不是夢~↓

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

↓透過發佈帖文賺取收入!立即參加!↓