好多人都話喺香港抽到公屋，其實都算係人生勝利組！但有網民喺連登討論區發帖求救，話排咗公屋好多年，早幾個星期終於有得見主任，以為成功在望，點知忽然收到公屋申請被以「家庭總收入超出限額」為理由嘅申請取消通知信，究竟樓主做錯咗啲乜嘢呢？
家庭入息及資產肯定無超標
樓主表示自己嘅情況係咁：「最初搵社工幫手遞表，同家老申請2人公屋，家老一早零收入，頂多啲養老津貼之類，照計唔會計家庭入息之類，如果唔係一早主任都無得見。而家我都係搵萬七、八左右，交上去資料萬九都未試過，睇返房署資料，最新家庭人數2人，每月入息限額係$19,550，肯定唔會過到。另一項限額要求，資產淨值37萬更加冇可能，全家都無買保險、股票之類，更加無幾十萬，有冇巴打知衰乜？」仲問網民知唔知可以點樣上訴。
網民都即刻偵探上身，搵出樓主嘅申請，邊方面出咗問題：「睇下稅單全年入息幾多，除番12個月有無超」、「ot補水津貼佢都計埋」，樓主回應：「計埋都無丫，萬七、八已經總收入」，「見主任時會當面同你計有無爆數，有爆會即場同你講，然後1個月內收取消通知書，之後6個月後可以上訴」，樓主回應：「應該無，如果唔係唔會叫我補交多次份僱員薪金證明書，公司幫我填果份證明書，因為有個位有塗膠改液所以唔收，但資料方面完全清晰」。
樓主表示計嚟計去，家庭入息及資產肯定無超標，唔明點解會收到以「家庭總收入超出限額」為理由嘅申請取消通知信。
親戚畀零用錢使原來計收入？！
既然樓主堅持自己嘅收入無超標， 網民就將目標轉向樓主嘅長者家人以及各式津貼：「因為生果金吧？高津生果金都3~4千一個月」、「計埋消費券？你兩個人一年兩萬，計埋嘅話超左額？」，但有網民回應：「長生津唔計收入、生果金唔計、傷殘金唔計、所有政府消廢（費）劵唔計、在職家庭津貼唔計、書船津貼都唔計……得綜媛（援）計」，但忽然有網民提起老人家嘅零用錢」，觸動咗樓主嘅神經：「仆街，有少少印象，咁可能卡呢個位度！果日有問起家老仲有冇人比錢佢洗，上面有親戚間中有比佢，但銀碼唔係咩大數目，間中一千幾百咁」，網民都話：「而家最怕係計佢親戚啲一千幾百當收入，天光去樂富問下」，有網民潑冷水咁回應樓主：「講咗就冇啦，親友津貼計收入㗎！記得唔好犯法虛假聲明」，有網民都表示曾經遇過呢個情形：「呢個問題1823我問過房署，果一欄好似叫親友援助，比兩老家用只可以係申請表內嘅家庭成員先唔計入息，其他唔係表內嘅，理得你有幾親都一律計係入息」。
不過網民都覺得最實際，樓主都係應該快啲直接去向房署查詢「死因」：「我地又唔會睇到你d收入證明，自己上訴問返房署囉」，「去樂富記得8點好去排隊攞籌，冇哂籌只可以留張紙仔過幾日覆你。又或者1823 app問，唔洗去樂富又係過幾日覆」。
網民話公屋申請人嘅老人家嘅生果金及傷殘津貼等，係唔計入家庭收入，綜援除外。
但原來如果有非申請表內家庭成員，有畀「零用錢」老人家使，該筆金額都要當作入息計算。
不過網民都係叫樓主盡快去房署，問清楚自己嘅申請被DQ嘅原因。
text/Joyce
photo/HKET圖片庫
============
同場加映：
【蝸居睇樓團】元朗520呎市中心樓！
變私人打卡cafe 展示旅遊手信＋清新木系庭園風
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】位元堂凍乾水果脆套裝！↓
↓ 冷凍乾燥技術鎖住濃濃果香！/ 保留營養素及豐富膳食纖維！↓
↓【必收藏】最新深圳食買玩攻略！↓
↓ 大灣區一小時生活圈！最新打卡熱點／熱門美食等！↓
