鑽石廳形狀三尖八角 但勝在私隱度高？ 網民熱議：鑽石廳設計好定唔好？

鑽石廳浪費空間之餘窗又特別細？
樓主形容鑽石廳設計垃圾兼反智，迫使住戶要用上三角形嘅電視櫃，而客廳亦通常冇露台，連帶廚房嘅開則亦呈三尖八角，就算屋苑有鄰近港鐵站嘅好處亦都無補於事。有網民就對樓主嘅睇法表示認同，認為鑽石廳設計三尖八角，浪費空間之餘又難以擺放傢俬：「鑽石廳呃傻仔買..本名三尖八角」、「間屋夠大未必係問題，不過一定係浪費咗空間」、「梳化同電視機唔可以平行咁擺」，更有網民認為鑽石廳嘅窗戶特別細：「同埋有冇法國(發覺)，鑽石廳個窗口都好細」、「最x街係D(啲)窗特別細，就算點豪裝都感覺樣衰」，不過亦有網民認為新樓客廳設計亦不見得十分好：「依家新樓個廳好x好？窄長到擺完梳化坐上去對眼貼住部電視，都未講行唔行到出個露台仔...講到尾都係尺寸問題，尺數大自然有空間，空間大自然易設計/擺家私(傢俬)」

鑽石廳私隱度較高？景觀又開揚？
不過有網民就認為鑽石廳設計亦有其好處，客廳私隱度會較高之餘景觀亦較開揚：「好處係可以係(喺)廳唔閂窗簾都唔洗(使)你眼望我眼，當年一大潮流黎(嚟)，以前d(啲)廳大d(啲)，又冇咁興裝修，三尖八角都好好擺傢俬，套用今日standard，就唔得囉」、「整體私人(隱)度係高左(咗)，景觀好左(咗)，但放傢私方面差左(咗)」、「鑽石廳設計會少咗樓望樓，就算內園景觀一般都會開揚啲，上中原睇下麗港城同四小龍就會明」，亦有網民指鑽石廳面積大，感覺更為闊落：「其實依啲舊則廳大可以拉直個電視櫃，拉完同梳發既(嘅)距離都仲係好闊」、「有朋友屋企放張L型大梳化，感覺都可以好開揚」

有網民認為鑽石廳有形狀三尖八角、浪費空間、窗戶細小以及無露台等缺點。

不過亦有網民認為鑽石廳私隱度高、面積大以及景觀開揚。

可加裝電視架以解決鑽石廳問題？
對於鑽石廳難以將電視機同梳化平行擺放，有網民就認為加裝電視架即可解決問題：「我屋企就係鑽石廳大則，櫃係貼牆，無拉直，將電視上牆加個mount可以拉出調角度，櫃貼牆令個廳好寬落」、「用活動電視架都叫解決到睇電視問題」、「宜家有啲電視架可以較角度，應該會易就位啲」，亦有網民表示雖鑽石廳有其缺點，但卻有更大嘅可用面積以及有明廁等嘅優點：「鑽石廳的確有佢個缺點，但係鑽石廳嗰個年代係計建築面積。同時都會有好多窗台。對比返今時今日近幾年啲樓。同一個實用面積，鑽石廳個啲單位個可用面積係大好多。所以依樣野(嘢)真係有辣有唔辣。當年出咁多自然有佢個受歡迎嘅地方，有對流窗，無黑廁等等」

鑽石廳是避免發生「廳望廳」的情況？
另外有網民就問到點解當時會有鑽石廳呢個設計產生，有網民就指係為了避免「廳望廳」嘅情況出現：「80年代個(嗰)時大部份係十字樓，經常會90度角廳望廳，鑽石廳就係用黎(嚟)避呢個問題」、「呢個真係當時鑽石廳賣點，果(嗰)個年代其他樓好多都係直望人地大廳」、當年d(啲)樓真係可以喺廳望到隔離(籬)屋個廳，0私隱」，亦有網民指設計係為了更適合於將兩個單位打通：「以前聽AA(意指地產經紀)講話係for你買兩個打通既(嘅)設計」、「鑽石廳打通堅正」、「打通咗客廳大到，飯廳唔整櫃又可以攞盡位放張超大圓檯，個(嗰)陣啲則的確係兩個單位一邊」

有網民指加裝可調較角度的電視架就能解決鑽石廳傢俬難以擺放的問題。

有網民指鑽石廳設計是為了避免當年「廳望廳」的情況，亦有網民指是為了更適合單位打通用。