區區有髀髀2!全港邪惡炸雞髀小店地圖(Part 2)

2015.03.31

 

傳說征服晒Part 1啲髀髀後,人會好燥底。

上集收到嘅反應包括「xxx都唔介紹,廢文」、「無xxx點算邪惡?編輯要炒」、「唔好介紹乜乜乜我唔想排長龍」,嚟到Part 2,為大地帶來嘅美腿將會進一步惡化,食埋下面啲髀髀,真係會生痱滋架哈哈哈........ 痛。

#自暴自棄協會

第 1 站 智多星與小食堡 長沙灣長年小食店

長沙灣多老舖大家都知,街坊味濃,而智多星係其中一間屹立三十幾年(老闆親述)嘅快餐店,以前啲人去呢頭啲舊戲院睇戲,就會過黎食吓炸髀雞翼。

智多星嘅肶肶落唔少粉去炸,雖然係咁,未至於搶走雞髀肉味。呢隻髀製作過程係咪好講究?唔係,只係三十年港式快餐嗰種Casual,原來仲喺度。

肶肶大小:★★★★
香脆程度:★★★★
入唔入味:★★★
係咪即炸:Not really,炸起等你買

智多星快餐店地址:
http://hk.ulifestyle.com.hk/spot/detail.html?id=ABdGDlo2BwxZHgNp 

小食堡係一間長沙灣居民勁讚嘅炸物小店,雖然炸物好邪惡,但係老闆好善良,同街坊關係唔錯,仲保證小食即叫即炸。即炸係需要時間,而時間係好寶貴,不過隻髀值得你等,醃得好鬼入味,可以要埋辣粉。老闆好開心咁話,呢度好多學生幫襯。點解元州邨班細路夜晚食唔落飯?問佢。

肶肶大小:★★★★
香脆程度:★★★
入唔入味:★★★★★
係咪即炸:Always

小食堡地址:
http://hk.ulifestyle.com.hk/spot/detail.html?id=ABdGD1oyBwpZFgNj 

即睇全文介紹

第 2 站 九龍東日月星 終於都出現

一早諗住寫日月星架喇(唔係馬後炮哈哈哈哈),乒乓波拍咁大嘅雞髀喎,年中唔少髀迷都要返黎上電。日月星隻索腿,一上碟,燙口架!!

最正係呢度嗌雞髀會連手套上檯,啲人坐晒出條巷戴住手套做手術,個moment係幾難忘。 

肶肶大小:★★★★★
香脆程度:★★★★
入唔入味:★★★★
係咪即炸:Oh yes!

日月星快餐店地址:
http://hk.ulifestyle.com.hk/spot/detail.html?id=ABdGDlo0BwpZFQNt

即睇全文介紹

第 3 站 太安樓與真滋味 東西港島代表

上次介紹咗港島中堅分子「丹麥餅店」同「樂景」(睇Part 1啦),其實港島東西都有兩大肶神座陣 - 東有太安樓,西有真滋味!(尖叫)

太安樓呢間嘅雞髀分「特大」同「小」,特大有幾大?下圖用乒乓波拍出黎比較。係呢,究竟日月星定太安樓隻髀大啲?打場波先知。

即使無幾耐前加咗兩蚊,而家大髀都係$20一隻,抵食啦!(落椒鹽!)

肶肶大小:★★★★★
香脆程度:★★★★
入唔入味:★★★★
係咪即炸:Oh yes!

太安樓姊妹美食店 (炸物店)地址:

http://hk.ulifestyle.com.hk/spot/detail.html?id=ABdGDVo3Bw5ZEgNs

西環宵夜王「真滋味」個名幾有雷?你喺facebook群組「西環變幻時」Po佢隻肶肶,閒閒地過百like。被譽為「無得輸」嘅真滋味髀髀,雞皮有少少焦黑,黑絲美腿夠鬆脆!

除咗炸髀,燒髀都好好食,鍾意就食晒兩款啦唔好煩。燒髀要早15分鐘打電話去嗌佢燒定,嗌咗之後唔好走數,西環班兄弟唔會放過你。 

肶肶大小:★★★★
香脆程度:★★★
入唔入味:★★★★★
係咪即炸:Oh yes!

真滋味地址:
http://hk.ulifestyle.com.hk/spot/detail.html?id=ABdGD1o2BwNZFANv 

即睇全文介紹

第 4 站 萬芳與華盛頓 元朗點會無髀髀

我直入元朗,你老豆疊羅漢。

萬芳冰室又要排長龍,叫外賣。佢個茶餐sell特大雞肶拼沙律或薯條。一見到隻髀,從aerial photo望落去,版圖唔算好大,初頭諗住「大小」打四粒星算,點知一拎上手,啲肉兩層波鞋氣墊咁厚,頂你呀哈哈哈,五星星我畀你呀對唔住大佬。隻髀好油(漏到成個飯盒底都係),醃味濃,適合重口味人士食用。 

肶肶大小:★★★★★
香脆程度:★★★
入唔入味:★★★★
係咪即炸:Oh yes!

萬芳冰室地址:

http://hk.ulifestyle.com.hk/spot/detail.html?id=ABdGDVowBwNZFwNi 

至於元朗網民推介嘅「華盛頓快餐店」,佢係用鹵水髀,再拎去炸,雖然呢一點會有人質疑佢係咪正宗炸肶,但做雞肶的方法有好多,做歌手都唔一定要狂叫乜乜乜啦,所以呢隻相對善良嘅炸鹵肶都好入味,值得推介。

肶肶大小:★★★
香脆程度:★★★
入唔入味:★★★★
係咪即炸:Oh yes!

華盛頓快餐店地址:

http://hk.ulifestyle.com.hk/spot/detail.html?id=ABdGD1o2BwpZEgNu

即睇全文介紹

第 5 站 新翠奇樂快餐店 多謝網民推薦,係抵食喎!

原本唔係諗住講呢間,但網民無私推介,就去試試。

奇樂快餐店,位於大圍新翠邨,舊式快餐店主打碟頭飯。對比對面間連鎖快餐店,奇樂個裝修顯得殘舊,但因此更耐人尋味。

一個炸肶飯盛惠$29,嗌外賣嘅話,巨型炸肶 Default 設定為「另上」,因為驚佢焗腍?係,仲有就係,呢個飯盒,根本就容納唔到隻髀。 

肶肶大小:★★★★★
香脆程度:★★★★
入唔入味:★★★
係咪即炸:嗰日無,炸起等人買 

奇樂快餐店地址: 

http://hk.ulifestyle.com.hk/spot/detail.html?id=ABdGD1o7Bw1ZFANq 

即睇全文介紹

活動資訊

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【限時搶⚡】日清盈優青汁套裝!↓

↓ 日本製造 / 2款口味:清爽蘋果味、濃厚白桃味!

↓ 日本製造 / 2款口味:清爽蘋果味、濃厚白桃味!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

↓透過發佈帖文賺取收入!立即參加!↓