熱愛優質生活

走入「旺角區後花園」尋寶!其實太子唔止得一個花墟,一間賣菠蘿包的名牌冰室

太子,明明在旺角區內佔據了一個很重要的角色,但給人的感覺就總是「隸屬」於旺角之下,一直做「配角」。你話啦,幾時聽過人話「不如今日去太子行吓」?

唔得,小妹要為「配角」爭一口氣,在35度的下晝帶大家走訪這個「旺角區後花園」,到舊店潮鋪尋寶,務求讓「配角」為威番次!

第 1 站 文華冰廳 其實太子唔止得一間冰室

講到太子的冰室,好多人都會第一時間聯想到賣菠蘿包賣到上旅遊書那間「金X」,先不論它的菠蘿包味道如何,多人迫爆的程度已令小妹有點卻步。其實,太子亦有另一間於90年代頗有名氣,裝潢多年來不變的懷舊冰室 – 「文華冰廳」。

文華跟很多冰室一樣,鋪前有一個玻璃櫃,放着各式各樣的食品,當中有雞尾包、紙包蛋糕、椰撻等舊式麵包及蛋糕。打開那道有點古老浪漫的「lace屎」門,昏黃的燈光打落紙皮可地板上,有點「王家衛電影feel」。雖然冰室位於鬧市,但價錢多年來依然合理,早、午、特、快餐只賣$29。

味道如何?過得去啦,凍奶茶好飲,比起食物,小妹比較享受那種時光倒流的感覺。(隔兩條街間連鎖茶餐廳賣$40個早餐)

第 2 站 美之時裝入口店 掃盡$5一件「來佬貨」

飲完凍奶茶,去花園街濕濕平,要數花園街的名店,一定不少得「美之」!

美之一眾愛復古的文青、知慳識儉,以及家傭姐姐的集中地,入口剪牌時裝由$5起,恤衫、熱褲、長裙、牛仔褸統統都有,無誇張一件夾住一件,迫過行年宵。可能是太多貨,而且終日不見天的關係,美之不時會散發着一陣薄薄的「味道」,無關係吧,尋到寶最實際。

雖說$5起標,但絕對不是件件都超平,店員都會按款式及牌子標價,靚啲咪貴啲囉,小妹的taste應該同店員差不多,隨手拿起兩條裙都接近$200,算唔算識貨呢…一條徐小鳳波點裙,一條民族碎花裙,襯件淨色T-Shirt,靚哂,可以去草地扮文青! 

第 3 站 無名小店 招牌都無但有靚蜂蜜

一直走到界限街,人少了一點,店鋪和貨品的價錢也「踏實」一點,經過米鋪、校服店和模型店,小妹被一間無裝潢、無招牌的小店吸引住。

樸實簡陋的木製層架上,放着一個個大玻璃樽,遠看還以為是一間藥材店,走近才發現是多種台灣進口的水果乾,咦店主在哪兒,無人看鋪,不怕有賊嗎?

這時一位年輕店主才施施然走出來,一問之下才發現小店原來已開業13年,一直連個名都無,做開街坊生意,賣蔬果、水果乾為主,不過亦都有人專誠前來尋「蜜」。無名小店出售來自漳州的蜂蜜,數量不多,賣完就無,少少斯文,少少靚仔的老闆話近期冬蜜大熱,夏天最啱飲。

比起靚仔老闆,小妹還是喜歡店內的「貓星人」都一點呢~ 

第 4 站 津津.好金の味 一次過食12粒麻辣大雲吞

行了大半日見肚餓,等過馬路時被一陣麻辣香氣及店前人龍吸引住,辣?小妹至啱!

津津.好金の味於太子區內頗有名氣,除了因為它的辣汁夠「麻」、雲吞夠大粒、做外賣的速度夠快外,麵食的價錢亦非常吸引,$24十二隻大雲吞仲有麵底,有無咁抵食先!

不止雲吞,原來麵條都是小店自家製,沒有用上廣東生麵,反而用上擔擔麵,襯襯那個重慶麻辣風味。食客當然可以選擇麻辣程度,走辣、小辣、中辣和大辣都有,小妹食得辣都未敢選擇大辣,超攻鼻!35度高溫下,站在街頭滴住汗食麵,還真的是第一次… 

第 5 站 Cafe Paradise 新進童話式cafe

熱到就溶,急需一杯凍飲降降溫,記起有間cafe開業不久,出名大杯水果沙冰,熱到溶之前要飲番杯!

「唔怕生壞命,最怕改錯名」,Cafe Paradise無改錯名,單看門面已經有一種「天堂、童話」的感覺,未入cafe前小妹首先跟那個旋轉木馬裝飾瘋狂拍照(自拍合照)。

一坐低,立刻點了一杯水果沙冰,味道清新,酸酸甜甜,夏天飲好開胃!店員介紹,再點多一份All Day Breakfast,售價$78,明明剛才先鯨吞了一碗麻辣雲吞,但見到賣相好、份量豐盛的「早餐」,竟然九秒九開動,秒速食完,還忘記拍照,小妹失職了…

內容評分
評語