騎呢嘉賓放笑彈！麥兜暗寸「Uber」風波

《第35屆香港電影金像獎》於今晚隆重舉行，大家仲記得上月奧斯卡頒獎禮上，頒發「最佳動畫短片」和「最佳動畫」時，三隻Minions﹝迷你兵團﹞和《反斗奇兵》的巴斯光年和胡迪幾位「非人」嘉賓玩轉奧斯卡，大放笑彈，而在香港電影金像獎上的「非人」頒獎嘉賓表現亦不失禮！

大會在頒發「最佳音響效果」時，安排了兩隻港產卡通人物麥兜和《捉妖記》入面的胡巴頒獎兼搞gag，麥兜問到胡巴搭咩車去會場，胡巴貫徹戲中角色，只會說：「wu-ber」不過就被一向傻更更的麥兜聽成「Uber」，而麥兜更話對方應該搭唔到地鐵，因為「體質太大」，暗寸「Uber風波」和「地鐵大型行李風波」，引起全場笑聲！ 

另外，羅家英、田啟文（田雞）及林雪擔任「最佳美術指導」及「最佳服裝造型設計」兩獎的頒獎嘉賓，三人可謂全場「最騎呢」嘉賓，三人擬似模仿韓國天團BigBang的造型，羅家英帶上一頭鮮紅假髮，配花俏外套，而田雞就駁了一個九一分界金色長髮，至於最「正常」的林雪都穿上花裇衫加紳士帽，而且仲擺出叉腰chok甫士，三人一出場可說「嚇窒」全場，效果爆笑。不過田雞就擺烏龍，誤以為「最佳美術指導」的得獎者沒有到場，由自己代為領獎，令場面出現少尷尬。