開張附屬卡俾女朋友，不知幾有型
文：B612
喺公司忙到一頭煙，女朋友Text我，叫我幫佢淘個電腦袋。咋咋臨搞埋啲手尾，就收工去地鐵站搵佢。
「呀！我唔記得增值八達通，Sorry，等我一陣。」
「唔洗Sorry喎傻豬，其實你有邊一次係記得預先增值啫？:P」
女朋友打咗我個頭一下，就跑去增值。我哋去油麻地間電影中心睇《功夫熊貓3》，點知得返頭兩行，我又唔想坐咁前，所以就走咗去食放題。
「你今個星期六同Betty去台灣小心啲呀！有無帶夠錢？唔好亂買嘢呀！」
「夠呀，知喇。我應承你，除咗化妝品、書、Mask同平底鞋之外，其他一律唔會亂買！」
「嘩仲有『其他』嘢咩？……唉，我怕你都係唔夠洗，你拎我張卡去旅行啦。」
跟住我就喺銀包拎咗張信用卡遞俾比佢。
「吓？點用架？我到時係咪要學你個簽名……咦Chan Man Ki？點解張卡有我個名嘅？」
「特登開俾你架，仲幫你申請埋八達窿自動增值，Set埋Apple store，以後你就可以買App呀、用信用卡上網買嘢、訂戲飛咩都得，去旅行有咩事又多個保障，好多時買嘢仲有折架！你唔鍾意我上次買俾你嘅手袋，咁你而家可以自己去揀返個啦。」
女朋友雙手拎住張卡，好似收到張會考30分（得喇咪嘈我個年代無DSE架）嘅成績單咁嘴角含春，一直甜笑望住我。
「嗱嗱嗱，你唔好太感動呀，我純粹諗住搵多個人幫我儲Miles架咋。」
「做咩對我咁好呀？你唔怕我係咁買嘢洗晒你啲錢咩？」
「唓，一睇就知我幾百萬未開頭啦，洗嚟洗去都係面嗰浸啫！快啲食啦，個放題限時架！遲咗要罰錢！」
雖然之後，除咗每個月八達通自動增值，濕過一兩次平，佢都無乜點用過張卡。不過見到女朋友用自己開俾佢嘅附屬卡買嘢，有能力負擔起另一半想要嘅嘢，其實真係好有滿足感，自我感覺非常良好。
返到屋企，阿媽問點解有封我女朋友嘅信寄咗嚟我哋屋企，打開一睇：
「哦，係我幫阿琪申請張附屬卡嘅月結單之嘛。」
「附屬卡？我養到你咁大呀，飯都唔請我食多一餐呀，又唔見你開張附屬卡俾阿媽嘅？你呀……」大‧穫……
「呃……梗係唔係啦，唔知點解你嗰張仲未寄嚟之嘛，應該係因為信用額大啲所以未搞掂喇！嗯！」
「真係有我份架？！嘻，算你啦！不枉我養咗你廿幾年呀。想當年陀你嗰陣，我日頭返工夜晚……」唉，真係失策！
本篇圖文獲作者B612授權刊登，未經准許，請勿轉載！
B612 Facebook：https://www.facebook.com/b612lpp/
港生活人氣本地熱話
【免費送Rollink旅遊系列✈️🌍】
↓ 帶走人氣摺疊旅行喼 x Mini Bag！↓
【請您去】iSQUARE國際廣場「爆」趣童玩之旅💥
↓ Striking爆炸糖Strikids(爆炸仔)小隊✨ + 本地懷舊玩意元素🙌 ↓
