我帶咗《一蘭》食糖心蛋送嗰包鹽返公司做手信！

文: 藍橘子

有一種識做人，叫買手信。

不論你請大假去旅行，遠至歐洲定近至長洲，就算唔買手信畀屋企人，都要買畀同事。因為屋企人唔會怨你，頂多問你有冇著夠衫，但若果你兩手揈揈返公司，同事一定會背後講你唔少壞話。

但大家千萬要留意，同事們唔係咩手信都收，有三大法則大家一定要遵守：

一）禮物要花心思，嘢食要夠好食。

二）阿信屋唔可以有得賣。

三）之前未買過。

過了第一關，同事們又會開始關心你去旅行洗咗幾多錢，如果超出佢哋預期，就一定係你唔識慳住去旅行！所以，標準答案一定係每晚都訓街，每餐食杯麵，全部洗費都用落買手信度。

今日，我剛剛去完旅行返到公司，但早已經充分準備好手信送畀各位親愛同事。

當我行入公司門口一刻，所有同事就對我虎視眈眈，我走埋去放零食嘅櫃，放低為佢哋精心搜羅嘅一系列手信，同事Kelvin忍唔住走埋黎睇，開始嫌三嫌四…

「藍橙仔你無嘢嘛？酒店送嘅咖啡茶包？日本隨街派嘅無料案內所紙巾？餐廳送嘅濕紙巾…嘩連酒店啲牙膏牙刷都帶返黎啊？你有冇乞兒啲啊！」

「我見酒店有得拎，咪拎返黎囉，反正免費嘅唔好浪費嘛，仲有幾樣手信，真金白銀買㗎大家等等。」

聽見Kelvin喊驚咁，同事們開始圍埋黎，問我仲買咗乜，我話份禮物好神秘，希望大家伸隻手出黎，閤埋對眼唔准偷睇，保證日本貨。

大家聽見有手信都好聽話。

於是，我小心奕奕咁將我喺大阪食過嘅《一蘭》拉麵店，叫隻糖心蛋附送嗰包鹽打開，慢慢倒落佢哋隻手上面。

「係咪星沙啊？我聽人講日本有星沙㗎！」我當然無取笑Suki，星沙係沖繩唔係大阪。

「係咪日本好出名嘅天然海鹽啊？」Kelvin用條脷奶，但好快就發現我手上面一蘭嘅包裝。

同事們紛紛慘叫，好似放咗督屎喺手上面咁，誇張到…

「所以我早就幫大家準備好紙巾。」我指一指由日本拎返黎嘅無料案內所紙巾同餐廳濕紙巾。

同事們忙於抹手，我就拎埋袋入面兩樣手信出黎，Suki見狀又即時撲過黎。

「呢隻蝦片阿信屋咪有得賣囉蠢人！」Suki大感失望，跟住佢又發現咗另一樣手信。

「咦！呢隻咩餅黎？未見過喎，包裝好得意啊！我要試食先！」Suki將佢拆開，成塊餅塞入口。其他同事都爭住拎一塊黎食，但就無人理包可憐嘅蝦片…

「淡淡哋，有少少苦，幾特別吖～係咪綠茶餅啊？」Suki真係冰雪聰明，估錯。　

「我覺得有回甘茶香，係咪煎茶？！」Sales Team嘅Adam都估錯。　

於是我解答大家問題：「其實呢，包蝦片真係喺日本買。我試過幾好食，同香港唔同味所以買返黎畀大家試。」　

「至於大家搶住食嘅係鹿仙貝。我去奈良餵鹿時買多咗，見幾得意帶返黎畀大家睇，估唔到大家仲喉擒過啲鹿。」　

個個同事聽到，都衝入去廁所刷牙漱口，但個口仲好大陣草青味，我就好好人咁沖定酒店茶包同咖啡畀佢哋。　

真係好，我帶咁多手信返香港，同事們都好鍾意，一日之內用晒。

開心。 

本篇圖文獲作者藍橘子授權刊登，未經准許，請勿轉載！

藍橘子 facebook: https://www.facebook.com/BlueGodZi/