中佬有火!離開銀行全職填詞 梁栢堅改詞改到18禁

文:
2015.08.16

文:Marcus 

♫聖誕老人~剝衫剝褲~騎著鹿車去賣淫~~♫
♫雪姑七友七個小矮人~雪姑七友七個同床瞓~~♫
咦,遮眼!怕什麼醜?肯肯定你們小時候都喜歡一班同學圍在一起改咸濕歌詞,一起陰陰嘴笑,今次訪問主角梁栢堅(PK)一樣,有留意他Facebook的,都知道他是個喜歡搞搞震的人,得閒惡搞兩句歌詞,得閒串兩句政府,最近他和小學同學番簡強出了一本包了膠袋的歌詞集《甜詞》,好好地改詞,為何十八禁?看過後就知道,66首作品入面充滿著露骨的文字,咸過屋企樽豉油(所以我都冇辦法在此引用),今日筆者就化身腎科醫生,為這位甜詞人檢查一下有沒有鹽分上腦!

港生活編輯=港;PK=梁栢堅

凍奶茶要少甜 睇咸嘢要多甜多奶
港:「番簡強係唔係真有其人?」
PK: 「真㗎,書中有合照,我同佢由細識到大,他本身都係一個普通返Office工嘅人,有個女,可能就坐喺你旁邊,我諗佢屋企人都不知佢寫呢啲詞!」
港:「有冇畀老師捉過?」
PK: 「當然有,試過聖經堂同佢喺角落竊竊私語,老師過來睇我哋本聖經,見到我哋將經文都改成咸嘢,佢心
點解有啲咁嘅學生,哈哈!」
港:「點解書中嘅詞要去到包膠袋咁盡?」
PK: 「唔夠咸不如唔好改!講明係禁書更盡興,估你唔到好多女仔話鍾意看!」
港:「書中提到香港以前其實有好多學咸嘢嘅渠道,例如黃霑的《不文集》、《今夜不設房》、《大咸濕》等,香港人喺性方面係唔係好壓抑?」
PK:「50、60年代經濟開始起飛,大家開始追求娛樂,就出現咗好多咸嘢,例如有份叫《今夜報》,刊登好多色情小說,仲有夜總會林立,之後王晶、星爺都好多戲少少咸多多趣,每個人睇完都會偷笑,大家都需要性,呢啲產品都有一種疏導性需要嘅作用。」
港:「而家香港人係唔係性觀念比舊時開放?」
PK: 「以前無網絡都會同三五知己討論,而家就可以公開講,你上討論區嘅講故台,多甜故到你追唔晒,甜故先有市場,一甜就多人鍾意,多人鍾意就會有人留意去改編做電影,再要加甜。」
OK,初部證實此人腦部偏黃但正常,可以談其他話題。


一改成名天下知
快40歲的梁栢堅原來下年已經入行十年,但說到令全十幾億中國人都認識他,不是誇張,就靠他10年由富士康工人自殺事件啟發,把《富士山下》改成《富士康下》……


PK: 「我都無諗過,當時個個香港明星都玩微博,就跟著玩,以為大陸網民唔識廣東話,點知又好似明我寫咩,仲瘋狂轉載,不過而家大陸人嬲咗我哋,要封我哋Account,我哋又唔想理佢哋,就轉戰玩Facebook。」

之後他就好似食過牛歡喜一樣回不了頭,改了好多諷刺時弊之作品,像笑蔣麗芸與梁振英緋聞的《愛在元秋》、笑自由行小童旺角當街便溺的《直腸無限好》等,還有網民把他的詞唱出來。且慢,他是不是不用工作?好像很空閒。PK說改一首詞快的話幾個字就改完,不花好多時間,而他那時還在銀行後勤,更是中層人員,大家都好忘了,他同時是一位流行曲作詞人,他的同事知道很關心他:「佢哋第一件事就係問我有冇演唱會飛。」不過一年多前,銀行因為業務重組,他被辭退,變成一個全職Freelancer,寫一份詞只有幾千蚊再加幾仙播一次的版稅,他怎樣支撐生活?

PK: 「而家收入無疑係少咗,但我發覺好多Freelancer好似小克都經歷過,搵得少消費都會減少,唔會生活唔到,你繼續做好自己,自然有機會來,如李小龍說Be Water。」

他的確非常努力,筆者看到他在Facebook出Post上多了好多,改詞變成他其中一份無錢的正職,笑「鳩嗚」潮警察的《黑警正傳》、笑梁振英老婆的《龍蝦》、笑匿港九年大陸童的《耿耿於「懷」》都在網上廣傳,而他亦成功製造多次話題,包括Share許志安被認錯杜德偉和梁振英去超市買壽司的相片,完全緊貼年輕人。  

港:「老老實實,你係唔係高登仔?」
PK: 「我只係CD-ROM(只讀不回),嗰班友黐X線,好多高手,一班人一齊改詞,四書五經都放到入文,又發揮到粵語文化抵死、賤格、食字嘅特質。」
港:「你點睇抽水文化?」
PK:「
抽水好適合香港人,又要快,又要有橋,如食澳牛。」

憤怒的中佬
梁栢堅也有很多正經之作,他不走夕爺、Wyman的情歌路線,因為他們太出色好難超越,於是走另類題材,他形容自己是小士多,大超市外的選擇,當中與樂隊Kolor的合作與他的惡搞詞互相呼應,都突出到他敢言抱不平的性格,《天地會》反思資本主義、《神龍教》反國教,另外陳柏宇的《動物農莊》批評2012特首選舉狼豬對決。

港:「你上年尾有冇去佔領?」
PK:「有,好多好出名的藝人有去你哋唔知啫,講出來嚇倒你,不過我不會幫他們出櫃。」
港:「有冇人因為你嘅立場而唔畀嘢你做?」
PK:「有都唔會直接告訴你,長遠睇工作量有冇減少先猜測,但我唔會後悔把自己嘅聲音講出來,如過個個都做擦鞋仔,最後大家攬住死!你可以討厭政治,但強權都會搞你要你屈服。」
港:「你覺得香港仲有冇有希望?」
PK:「我覺得雨傘運動係一個大爆發,唔只係政治,仲有好多年青人嘅創意,每天去佔領區都有唔同作品,有人話好似出現咗個烏托邦,跌咗錢都冇人執,而網上JFung、學舌鳥等都有好敢表達,即使暫時未爭取到啲咩,但淨返一滴血,都要Keep住呢種精神打落去,百花齊放。千祈唔可以好似梁振英咁睇低香港,抬高別人。」
(PK認為David Cheang的《話你戇鳩怕你嬲》是上年的年度之歌,比好多流行曲都好!)

印象中梁栢堅是個好豪放,什麼都夠膽說的人,或者對我不熟,起初他都頗正經,到後來聽到他說XY*#@,我想他要爆了,這才是他,然而當中充滿無限幽默感,他很樂意和年輕人玩,作為年輕人,筆者亦希望想和他繼續玩!無論講咸嘢定佔領,他都是個很黃的人,而且感覺到他的火越燒越旺盛,相信除了二次創作,他在流行曲的作品會受更多新生代關注,如他說,社會需要更多《國王的新衣》內的小孩,好簡單說出真相就可以。

(這首是他最喜歡自己的改詞作。)

 

其他專訪
前TVB主播陳珍妮講錯李克強阻晉升 來生不做新聞人?

信和音樂揸Fit人:「旺角未死!」

22歲女大學生IG賣糯米糍 2年賺$50萬開店做老闆

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

↓ 首創含微量酒精代餐 / 嚴選高級可可粉 / 加水即沖即飲!↓

↓【食在社群】免費請您食Buffet!↓

↓五星級酒店Buffet,品嚐環球美食!↓

↓五星級酒店Buffet,品嚐環球美食!↓