炎明熹21歲生日IG晒切蛋糕慶生照 長文剖白人生轉變：有意識咗自己做緊啲乜

嘆成長經歷高低起伏 陷入壓力無限循環

Gigi在貼文中以「7x3=21」感慨時間並非簡單的數學題。她回顧由14歲到21歲的時光，形容經歷了「3段唔同風景」與無數「高高低低嘅小山丘」。面對時間飛逝，她坦言十分震撼：「上年仲喺度感慨緊自己嘅20歲，好似仲未感受完就已經嚟到21歲」，更形容自己有種「靈魂已經飛走咗但意識仲喺度打轉」的錯覺，如今看着從前因功課而崩潰大哭的自己，不禁覺得搞笑。

點擊圖片放大

點擊圖片放大

她亦剖白了成長帶來的思想轉變，坦言因為凡事想得太多，導致常常陷入「做→壓力→hea →驚→準備→驚→壓力x1000! Boom」的焦慮循環，讓時間一眨眼就過去。不過，她深知這些包含着迷茫、成長、遺憾與純粹快樂的經歷，全部都是珍貴的回憶。她亦謹記長輩的提點，要好好放鬆並享受每一個歲數的自己。

感激粉絲沿路陪伴 視孫玥金句為座右銘

最後，Gigi不忘向一直陪伴在側的粉絲致謝，感激他們給予力量和勇氣。她幽默地以排球作比喻：「當我好似一個蝕咗氣嘅排球，你哋永遠都可以以唔同嘅方式幫我續返啖氣」。最後，她特別點名感謝前女排國手孫玥老師的教誨，表示會將對方「球不落地，永不放棄」的格言「銘記于心」，期盼21歲的自己能帶着昔日的初心，繼續用心感受未來的每一天。

原文如下：

「7x3=21
呢條數表面上冇錯，但其實時間從來都唔係一條簡單嘅數學題🤦🏻‍♀️😮‍💨
7年一步一步過，亦經歷咗3段唔同風景，裏面藏住好多高高低低嘅小山丘。

由14歲到21歲，覺得時間過得特別快。

上年仲喺度感慨緊自己嘅20歲，好似仲未感受完就已經嚟到21歲！！！！！！🤯🤯🤯震撼
（有種靈魂已經飛走咗但意識仲喺度打轉嘅感覺🙂‍↕️）
其實而家望返嗰陣嘅自己會覺得有啲搞笑😂
諗返起以前俾功課玩到崩潰到喊嘅自己仲搞笑👉🏻👈🏻

唔知由幾時開始自己諗嘢多咗亦可能想諗清諗楚，導致成日啲嘢都唔可以即時講同做，所以將好多野group埋咗一齊，然後：做→壓力→hea →驚→準備→驚→壓力x1000! Boom🤯💥repeat又repeat 好似搞到時間一眨眼就完咗咁🤣🤣🤣

同時呢3段入面，有啲係迷茫、有啲係成長、有啲係突然開竅、有啲係純粹嘅開心快樂同遺憾……全部都係珍貴嘅回憶
(然後成日都會有個乘以？嘅長輩跳出嚟同自己講要好好享受每一個歲數嘅自己，因為呢啲歲數都係屬於你嘅，類似咁，然後叫自己放鬆心情🐑）

望返轉頭，覺得時間之所以過得快可能並唔係因為日子過得快，而係有意識咗自己做緊啲乜。

所以希望21歲嘅自己可以帶住以前嘅妹妹們繼續感受之後嘅每一天。

最後當然少不了每一個階段陪伴我嘅「你」，
係你哋俾咗好多好多唔同嘅力量同勇氣我。
當我好似一個蝕咗氣嘅排球，你哋永遠都可以以唔同嘅方式幫我續返啖氣🦐🦐🦐🦐🦐🙉🙊🦀🦀🤍

也謝謝孫玥老師當時的「球不落地，永不放棄。」
我銘記于心🫀」