樓契唔見咗要補領會影響樓價？ 究竟將樓契放喺屋企有冇問題？

只能補領「核證副本」？會影響樓價同按揭？
樓主表示自己有些朋友將樓契放喺屋企，而並唔係放喺保險箱，所以就問若當樓契有所損毀，係咪可以向土地註冊處申請補領樓契。對於有冇得補領樓契呢個問題，有網民就表示的確可以補領：「可以，逐份計，每份幾舊水，最少20份係基本。如果係舊樓回收再起樓的話，我諗(價錢)再要x3」，不過亦有網民表示雖然可以補領，但就只能補領「核證副本」，並有機會對樓價以及按揭做成影響：「當年我問過律師話係有，不過再拎係true copy」、「如果樓契冇咗，系(係)可以去田土廳(意指土地註冊處)申請一份True Copy，但咁系(嘅)情況下，就會當冇契樓或樓契唔完整，銀行有機會唔借錢」、「樓契可以補，但問題到賣樓交易期間，對方律師樓可以不接受TRUE COPY副本，銀行律師樓亦可能會唔接受，唔批按揭比(畀)買家，總之唔見左(咗)正本，就好x麻煩」，更有網民指若失去樓契正本，樓價足足可下跌數成：「如果你賣樓，冇契會俾人壓價2成」、「樓契有得補領就唔會有冇契樓成交跌幾成樓價吧」

有網民表示若樓契遺失或損毀時，可到土地註冊處申請補領樓契，唯只能夠補領樓契的「核證副本」。

亦有網民指出若只持有樓契的「核證副本」，有機會會影響該物業價格以及無法申請按揭。

用保鮮紙、防蟲餅、密實箱可妥善保存樓契？
而一眾網民亦討論到究竟將樓契放喺屋企有冇問題，有網民就認為若小心保管就問題不大：「放在家裏也不大問題，只要小心保管就OK」，更有唔少嘅網民分享自己喺屋企保存樓契嘅方法：「可以放屋企，不過真係幾麻煩，我之前用密實膠箱，入面又放防蟲劑」、「我都是放床下底，仲要一大堆樓契，每一套契用保鮮紙包實，膠相底放防蟲餅，放完封實就防水防蟲！但唔防火」、「我用衣物真空袋，好過用保鮮紙再放膠箱，防蟲餅對紙張有腐蝕性」，亦有網民認為放於電子防潮箱內更為妥當：「我將屋契同啲珍郵一齊放喺屋企嘅電子防潮箱內，紙係最怕受潮，會發黃甚至爛！放夾萬好似大多數唔防潮，但香港防潮緊要好多，所以放電子防潮箱」

不過亦有網民認為將樓契放喺屋企相對上並不安全，建議要放喺例如銀行保險箱等嘅安全地方：「其實放係(喺)屋企，萬一吾(唔)見佐(咗)或燒佐(咗)，樓契都變成一間冇契樓，到你賣樓個(嗰)時咪知有幾大獲」、「無契樓只能平D(啲)賣，再從新要一份都唔會係之前的正本，所以一定要鎖保險箱或律師樓、銀行」，但亦有網民指申請銀行保險箱服務並不容易：「保險箱係稀缺資源，唔係肯比(畀)錢就有。要排，要篩選客戶！」、「係，要排隊，中銀要自己客戶先可以開保管箱，大型既(嘅)箱先可以平放A4紙，大型既(嘅)箱要中銀理財客戶先可以開，一年千幾蚊租」

紙本樓契保管麻煩應改為電子化？
另外就有網民認為保存紙本文件相當麻煩，樓契應該要轉為電子方式：「點解唔攪(搞)電腦化？用張卡查閱，已經佔咗一半保險箱」、「我都係放屋企，啲紙又黃又污糟，有時打開來看，仲會發現有書蟲添(㖭)！好心全部電腦化喇，什麼年代呀！迫人keep啲厚厚又殘的文件，又唔可以掉。制度不能進步嗎？」、「係，呢樣野(嘢)真係勁ONx，仲係紙質，唔講遺失，放得耐都會殘x曬(晒)啦」，亦有網民建議可向銀行申請按揭，將樓契交由銀行保管：「點解唔按比(畀)銀行，借十萬仲平過保險箱」、「俾著我，一直按俾銀行咪仲安全，又唔駛(使)俾錢入保險箱，又有低息貸款可以賺息差，一舉三得」、「同意，有些人會刻意長期按少少比(畀)銀行待(代)管樓契」

有網民認為使用保鮮紙、防蟲餅、密實膠箱、衣物真空袋以及電子防潮箱等方式就能夠妥善將樓契保存於家中。

亦有網民認為將樓契保存在家中並不安全，建議應放置於銀行的保險箱內或由律師樓代為保管。

更網民指現時樓契以紙本方式儲存並不合時宜，應更改為電子方式更為合適。