其實自己將垃圾放入垃圾桶有咩問題？
文:墨者
以下係一則上星期於麥當勞嘅見聞，篇幅有點長。
A：「咁耐都未有人黎執野既？」
B：「係囉都坐左5分鐘啦，咁點買野食啊？」
A：「坐多陣先囉，打埋依關先。」
再過幾分鐘過後A出去買野食，返黎之後企左係張檯隔離。
A：「點啊？野都買完都未有人黎執檯？」
B：「你放低係隔離檯先啦！」
然後A張成盤野食放係我面前，細細聲同我講：「我放住先。」當時我正準備拎電腦出黎做野，因為佢放左係我前面阻住我，我唔夠位放唔到電腦。
我：「先生其實我仲食緊野既，麻煩你可唔可以拎走你盤野？或者自己執走張檯既垃圾？」
B繼續同A講野而無理到我：「喂你不如出去叫個經理過黎啦，你睇下成場都無人執野，點食啊？」
我覺得同佢地講都唔會再有意思，我當時坐四人檯，我執起旁邊一盤垃圾放入垃圾筒，然後我自己坐過一個位。
A出去同落單既人講，咁好自然佢地落緊單唔得閒就梗係叫經理，跟住A就同經理愈講愈激烈，原本我已經戴左耳機都忍唔住熄左首歌聽一聽佢地講乜。
A：「我依家野食又買完，成個位都係垃圾咁係乜事？我買平餐就無得執檯啊？」
經理：「先生你冷靜少少先，其實我剛剛已經講過，今日職員調動出左問題，我依家可以幫你清理好餐檯先。」
A：「我依家唔係要你清唔清我張檯，而係我地由入黎去到依家起碼都十五分鐘，仲未有人黎執野？咁攪法你地係唔係唔做生意啊？啲野食我唔要啦，唔該同我退錢。」
我突然望一望食緊薯條既B，佢繼續望住A同經理既對罵。事情到最後係一位負責清潔既職員由樓梯跑上黎，因為經理同A係企係樓梯口對罵，該職員一上黎就見到，亦相信聽到佢地講緊既事。
該職員不斷向經理點頭道歉，好似係講唔好意思我遲到之類，而經理最後一句亦點明成件事。
經理：「唔緊要，係我臨時臨急叫你返黎既。你入去換好衫攪掂啲野先，慢慢黎。跟手執埋依位先生果張檯，唔該哂你。」
該職員：「係既係既。」
A：「即係點？無啦啦走多個人出黎就當無事？我依家唔要你啲野食啦，退錢！」
該職員一念迷惘，然後即刻拎住自己個袋清理好AB既檯。
經理：「野食買左除非係品質問題，否則我地係唔會退錢，檯已經清理好，先生你可以返去安心食用你頭先買既野食，歡迎下次光臨。」
A想繼續鬧落去，但B已經衝出去阻止，成件事告一段落。
AB為一對20出頭情侶，係佢地黎之前其實經理都出過黎執一次檯，不過執左幾張入面又有問題又走返入去。好明顯睇得出該日該麥當勞人手不足，即使無人清潔而去投訴，經理亦表明立即清理，但A先生又不接受，並要求退錢，令經理更加難做。
麥當勞會聘請有輕度先天（或後天）缺陷的人，而該名職員應該是就這種。在該職員開始工作時，AB仲係背後繼續討論剛剛事情，其實人手不足已經是一個很難解決的問題，而AB卻落井下石，行為十分不要得。我當時無拍片，亦無當眾指罵AB，如果我當眾鬧返A，其實我就是另一個A先生。
其實自己將垃圾放入垃圾桶有咩問題？去到麥當勞（或其他快餐店）時經常見到個個舉手，要求職員即刻清走佢地面前既垃圾，有禮貌嘅人會講一聲唔該，亦有一部份人會因為職員太遲過去執檯而不滿，口噏噏咁講足成餐飯。
職業無分貴賤，當中聽過部份家長叫小朋友唔好自己扔垃圾，原因係執野係留俾工人做，留俾清潔做，講到好似自己身驕肉貴，一掂下垃圾隻手就會溶咁。香港人食親飯就老奉咁等人幫你清走垃圾，其實有好多垃圾都可以自己清走，拎住個盤行兩步去垃圾桶倒左佢有幾難？有時上一手食野食到周圍都係就真係好難自己攪，但其實自己食完嘅野係咪自己扔左佢會好啲呢？
出街食飯黎講，香港人從來無「食完野執檯」嘅文化，當中原因都不外乎清潔職員很多、由細到大都唔執等等，其實某大型傢俱商店中嘅canteen都係奉行外國「自己清走食物」既文化，一方面可以令食客守規矩，唔會食到周圍係，另一方面可以節省成本。
可能你會話我見到嘅例子太極端，又或者如果個個自己執檯嘅話，清潔咪唔洗請人？但其實我想強調嘅係唔好覺得自己高清潔職員一等，又或者老奉坐係到等人幫你，學習一下外國文化並無壞處，學下自己食野乾淨少少，食完咪一次過將個盤上面嘅野扔落垃圾筒，旁邊又有酒精搓手液嘅。
題外話：大x樂、大x活的確好難自己清理餐盤，不過如果見到清潔職員好忙，又或者你舉左好耐手都見你唔到嘅話，其實都可以將成個盤拎去俾佢地，或者拎去收集垃圾嗰個位。
本篇圖文獲作者墨者授權刊登，未經准許，請勿轉載！
墨者 Facebook：https://www.facebook.com/makzewrite
港生活人氣本地熱話
【寵主專享🐾】請您試用AQUA PRO+TECH「PET PET護理套裝」！
【旅途無蝨】請您用AQUA PRO+TECH「驅蚊大師」滅菌驅蚊液 ！
